Latest News

Serchhip District-ah Lok Sabha Inthlanpui atana inbuatsaihna kal mek thlirho a ni

Image
Lok Sabha Inthlanpui neih tur atan Serchhip District-ah inbuatsaihna kalpui mek a ni a, he Inthlanpui neih tur atana inbuatsaihna hrang hrangte thlir hian nimin khan Serchhip-ah District Election Offficer leh Bawrhsap David Lalthantluanga hovin Nodal Officer te chu an thukhawm a ni.

Goodwill English Academy (GEA) in kumin a HSLC Result tha an neih lawmna an nei

Serchhip-a Private School pakhat, Goodwill English Academy (GEA) chuan kumin a High School Leaving Certificate (HSLC) Exam result tihchhuah taka an School atanga zirlai Exam zawng zawng an pass lawmna hun nimin khan neiin he hun hi Serchhip DEO Lawmawma chuan khuallian niin a hmanpui a ni.


Serchhip Auditorium-a Goodwill English Academy in Felicitation Ceremony an hman ah hian Serchhip DEO chuan Goodwill English Academy in HSLC Exam result chhuak ah result tha tak an neih chu a lo hriatpui thu leh a lawmpui thu sawiin, zirlai leh Zirtirtute thawhrimna avanga he hlawhtlinna hi chang an nih thu a sawi a, thawhrimna chu hlawhtlinna bul a nih thu sawiin an thawhrimna ah lawmthu a sawi bawk a ni. Serchhip DEO chuan Education in a tum ber chu mihring te a tha bera siam a ni tih sawiin, hei hi kan damchhung chauh ni lo, kan thih hnu thleng atan pawh a ni tih a sawi a, hei vang hian Education chu a Pathian thu hle tih a sawi bawk a ni.

Serchhip DEO chuan kan ramah Sawrkar School leh Private School te khaikhin an nih fo thin thu pawh sawiin, Sawrkar School-a fa te dah nu leh pa ten an fa te an ngaihsak zui thin lo nia sawi te pawh a awm thin tih a sawi a, zirlai nu leh pa te chu School-a an fate dah duhtawk mai lova ngaihtuah zui thin turin a chah a, zirna a hlawhtlinna atan nu leh pa ten mawhphurhna thui tak an nei tih a sawi a ni. English pawimawhna pawh sawiin DEO chuan, English chu International Language a nih avangin English thiam loh chuan thil tih tak tak a harsa thin tih a sawi a, chu mai bakah lehkhathiam kan tih te hi saptawng pawh thiam an nih avangin mipui ten English Medium kan bawh nasat thu a sawi a. Hindi thiam pawh a pawimawh thu sawiin, India ram atangin kan talchhuak mai dawn lo a, India ramah eng hna pawh kan thawh dawn chuan Hindi thiam a pawimawh tih a sawi bawk.

Serchhip Ramthlun Veng-a awm Goodwill English Academy hian kumin hian a vawi khat nan HSLC Exam hmachhawnin Zirlai 10 Exam te chuan an pass vek a, an zinga mi 10 te chu Distinction-ah pass in midang 6 te pawh hi 1st Division-ah an pass vek a, Serchhip Town chhunga zirlai pass vek School pahnih zinga pakhat niin nimin-a he hun hmanna ah hian heng zirlai hlawhtling te hi lawmpuina thilpek hlan an ni bawk.

Nimin-a he hun hman ah hian he School Principal Lalramzauva Zote chuan inlawmna thu sawiin, sawm bikte leh zirlai nu leh pa te atangin thusawi ngaihthlak a ni a, zirlai naupang ten an thiamthil chi hrang hrang an entir bawk a ni. GEA-ah hian Nursery atanga pawl 10 thleng zirna hawn ni tawhin kumin hian zirlai naupang 678 an nei a, thawktu mi 18 an awm mek bawk a ni.

Comments

Popular News (Last 30 Days)