Union Minister of State for Railways & Textiles in Mizoram rawn tlawhin Vawiin ah Thenzawl a tlawh ang

Union Minister of State for Railways & Textiles Darshana Jardosh-i chuan tunkar Inrinni thleng Mizoram a cham turin nimin khan Aizawl a rawn thleng a, Chief Minister a kawm hnuah Vawiin hian Serchhip District-a Thenzawl khua tlawhin khualzin mite hmun pawimawh a tlawh nghal ang.

Mizoram-a Textiles hmalakna hrang hrang leh Rel kawng siam mek te rawn enfiah turin Union Minister of State for Railways & Textiles Darshana Jardosh-i hian nimin khan Lengpui Airport atangin Aizawl a rawn thleng a, hemi hnu hian Raj Bhavan pan nghalin Larsap Hari Babu Kambhampati a hmuh hnuah nimin vek khan Mizoram Chief Minister Zoramthanga chu CM Bungalow-ah kawmin Mizoram-a Textile Industry hnuaia hmalak theihna tur leh Rel kawng chungchangte an sawidun a, he inkawmna ah hian Handloom and Handicraft lama Mizoram chawisan theihna te sawidunin, India ram thenawmte chu Textile lamah khawvela hmahruaitu an nih dan te, India pawhin nasa taka hma a sawn ve theih dan sawiin, Union Minister of State chuan Mizoram leh India hmarchhak State-te potential nei tha nia a hriat thu a sawi a. Rel kawng siam mek chungchangah pawh theihtawp hma lak a nih dan Darshana Jardosh-i hian a sawi bawk a ni.

Chief Minister a hmuh zawh hian BJP Office tlawhin ZOHANDCO Sales Emporium leh Weavers Service Centre, Chaltlang Lily Veng a mi chu a tlawh a, he hmunah hian Hnangtah leh Mizo puanbu te entir a ni a, ZOHANDCO Chairman C. Lalrammawia, Commerce and Industries Director Florence Zotluangpuii leh sawrkar mi pawimawh dangin an lo dawngsawng a ni.

Union Minister hian Vawiin hian Thenzawl a tlawh leh dawn a, Tourist hmun pawimawh te a tlawh hnuah Mizoram Handloom Export Promotion Hub-a Samarth Training a hawng dawn a, Puantahtute tan Pehchan Card leh Yarn passbook a sem anga, he hunah hian Serchhip a sawrkar Department hotute pawh an tel ang. Union Minister hi Thenzawl-ah riak nghalin naktuk ah Lamchhip-a Silk Pangang khawitute a kawm leh dawn bawk a ni.