Wine Rules la siam loh avangin Grape chingtu ten an thilsiam hralhchhuah kawngah harsatna an tawk

Hnahlan leh Champhai-a Grape chingtute chuan Mizoram sawrkarin Wine Rules a neih loh avangin an thilsiam hralhchhuah kawngah harsatna an la tawk reng tih thu an sawiin, MNF sawrkar chu Grape chin bultan tirtu an nih avangin beiseina an neih san thu an sawi.

Hnahlan leh Champhai tlawhtu Zalen thawktute hnenah Grape Growers Society hruaitute chuan tun dinhmunah chuan hriatthiamna in an kal hrih nawk nawk tih sawiin, Rules mumal tak awm se an duh tih an sawi a. Hnahlan Grape Growers Society Chairman C.Vanlalhriata chuan, “Sawrkarin Wine Rules a siam loh avangin a zawrh kawngah harsatna kan tawk a. Excise, Police leh sawrkar ten min hrethiam a; mahse, a ruk deuh reuh a zuar ang hi kan ni a, a buaithlak khawp mai,” a ti. 

Champhai Grape Growers Society hruaitute pawhin, “State thenawm, Meghalaya leh Arunachal Pradesh-ah pawh kan Grape hralhna tur hi kan hmu a; mahse, Export Pass a ngai si a, eng Rules atangin nge pek tur tihah buaina a awm avangin State pawnah pawh kan thawnchhuak thei hrih lo a ni,” an ti bawk. 

Sawrkarin dan hnuaiah Wine Rules mumal tak siam sela chuan Grape Market chu a thain kuthnathawkte pawhin an hlawkpui hle nia sawiin Hnahlan Grape Growers Society hruaitute chuan, “Tunah hian Nashik-a training chhuak mithiam ruaiin changkang takin kan siam a, kan thilsiam hi mipuiin an duh avangin tualchhunga zuarte pawhin duhkhawp zawrh tur an nei thei lo hial a ni,” an ti a. Champhai Grape Growers Society Secretary C. Zohmingliana pawhin, “Rules a awm miau loh avangin Vendor License renew-na tur a awm lo va, License tel lovin a zuar thin te pawhin risk an la ngam lo a; chuvangin, a hralh kawngah harsatna kan tawk a ni,” a ti a. Wine Rules chu awm se chuan state dang hralh dan ngaihtuah an tum niin a sawi bawk. 

Kumin bik atan Hnahlan Winery hian Grape leina atan Bank-ah cheng nuai 60 an dah lawk a, kum 2018 atang khan Grape hi Winery-ah kg. khat Rs.50 zela leiin Grape man hi an pe nghal zel a. Hnahlan Winery hian Isabella siamin Champhai Winery hian Champwine an siam thung a. Champhai Winery-ah hian Grape tui sawr sa, la hralh loh litre 77,000 vel awmin, Grape ching hi chhungkaw 143 awmin hectare 150 vela zauah chin a ni a. Hnahlan chhehvelah hian engemaw lai atanga Grape hralhnaah harsatna a awm avangin Grape chinga eizawng an tlahniam hman hle a, nikum khan qtls. 600 vel tharin kuminah khum an inbeisei a ni.

Comments

Popular News (Last 30 Days)

Vawiin-ah HSSLC Exam result