COVID-19 hri kai hmuhchhuah thar tlahniam hret

Niminpiah khan Mizoram-ah Sample 314 enfiah niin heng atang hian COVID-19 hri kai mi 12 hmuhchhuah an ni a, Sample enfiah atanga chhutin za zela 3.82 te chuan hri kaiin tunhnai chho ah Sample enfiah atanga chhuta hri kai hmuhchhuah an tlem ber tum nia hriat a ni.

Niminpiah a hri kai hmuhchhuah mi 12 zinga 11 te hi Rapid Antigen Test hmanga Sample enfiah 309 atanga hri kai hmuhchhuah an ni a, Lunglei Dustrict atangin hri kai mi 5 hmuh niin Serchhip leh Saitual District atangin hri kai mi pathum ve ve hmuh an ni bawk. Heng bakah hian Lunglei-a TrueNat Laboratory-ah Sample 4 enfiah niin hri kai mi pakhat hmuh a ni a, ZMC a RT-PCR Laboratory-ah Sample pakhat enfiah niin hri kai hmuh an awm lo thung a ni.

Nimin khan Mizoram-ah hri kai enkawl dam mi 74 lai an awm belh ve leh thung a, heti hian nimin tlai dar 5:00 thleng khan Mizoram a COVID-19 hri kai hmuhchhuah tawh chu 2,28,034 niin an zinga 2,27,155 te chu enkawl dam an ni tawh a, hri kai hmuhchhuah atanga chhutin za zela 99.61 te chu enkawl dam an ni tawh a ni. Tunah hian hri kai enkawllai mi 182 an la awm mek a, hri kai zingah mi 697 boral tawhin tun thla ni 2 hnuah hri kai boral an la awm leh ta rih lo a ni.

Mizoram District hrang hrang 11 zingah hri kai enkawllai awm lohna District pathum ala awm a, heng te hi Siaha, Champhai leh Lawngtlai District te an ni a, Saitual District chu hri kai enkawllai tamna ber la niin hri kai enkawllai mi 79 an la awm mek a, Aizawl District-ah mi 46 leh Lunglei District-ah 26 la awmin hri kai enkawllai tamna deuh te an ni a. Hri kai enkawllai mi 10 leh a aia tlem awmna District 4- Kolasib, Hnahthial, Khawzawl leh Kolasib District ala awm bawk a ni.

Comments

Popular posts from this blog

Bialtu MLA in Laptop pe