Mizoram Governor hnenah harsatna tawh te thlen

Mizoram Wood Based Industries Owners Association hruaitute chuan nimin khan Governor Hari Babu Kambhampati chu Raj Bhavan-ah hmuin an harsatna te sutkian a nih theih nan hma laksak turin an ngen.

Nimin-a Governor an hmuhna ah hian Mizoram Wood Based Industries Owners Association (MWBIOA) President C. Thanchuanga chuan Wood-Based Industry hi February 2021 atang khan awmze neia kalpui tan niin tunah hian hetiang Industry hi hmun 12 velah kalpui a ni tih a sawi a. Heng Uit 12 te hian February 2021 leh tun inkarah GST-ah sum cheng nuai 77 chuang an chhunglut tawh nia sawiin, tunah hian harsatna thenkhat an nei mek tih an sawi a. Rel-ah chauh lo chuan an bungraw siam te hi a siamna hmun atanga State pawna phurhchhuah phalsak an ni lova. Rel-a Wagon te awlsam takin an hawh theihloh bakah anni ang bul tan tir tan chuan sum senso a sang hle niin a sawi.

Heng an harsatna hi MWBIOA lam chuan Ministry of Environment, Forest and Climate Change hnenah kawngpui pangngaia lirthei lian hmanga an phur phalsak a nih theih nan dil sak turin Governor hi an ngen a. Myanmar atanga Zokhawthar kaltlanga Thingzai phurhluh a nih theihna tur pawhin hma laksak turin an ngen a. Myanmar-ah thingzai tha chi tam tak a awm thu sawiin, heng thingzai te hi Mizoram-ah lakluh theih tur list-ah dah a nih chuan Mizoram tan sum tam tak a thawkchhuak dawn niin an sawi a ni.

He inkawmna ah hian Governor Hari Babu Kambhampati chuan Mizoram-ah Industry lian tham awm rih lo mahse, Industry tenau tam tak, sum thawkchhuak thei a tam thei ang bera din erawh a tul thu a sawi a. Hemi atan hian thalai mithiam zawk te entrepreneur ni turin a tam thei ang ber an rawn penchhuah a ngai a ni, a ti a. Mizoram in sum leh pai-a tun aia a thawhchhuah theihna turin entrepreneur tam tak a mamawh a ni, a ti a. MWBIOA te harsatna tawh dan te pawh chiang zawka a lo zirchian hnuah Sawrkar laipui lamah a theih anga lo nawr a tum tih a sawi bawk a ni.

Comments

Popular posts from this blog

Volleyball S/F khel dawn