Agriculture Secretary in Khawlailung Sugarcane Grower Co-Operative Society Annual Assembly a hmanpui

Nimin khan Khawlailung Sugarcane Grower Co-Operative Society chuan Annual Assembly vawi khatna hmangin he hun hi Agriculture Department Secretary J. Hmingthanzuala chuan khuallian niin a hmanpui a ni.


Khawlailung-a Fu chingtu pawl, Khawlailung Sugarcane Grower Co-Operative Society ten Khawlailung Community Hall-a Annual Assembly an neih ah hian Agriculture Department Secretary chuan Fu chin chu eizawnna tling leh eizawnna ngelnghet anih thu sawiin, Khawlailung khua chu khaw taima leh tih takzet-a hnathawk thin, Kurtai a Mizoram a khaw lar leh hmingthang an nih thu a sawi a. Khawlailung khuaa Fu chingtu chhungkaw 130 te zingah chhungkaw engemaw zatin kumtin-a Lo vah leh Hal ngai thin, Tlangram Loneih an bansan ta chu lawmawm a tih thu pawh sawiin, Sawrkar Flagship Programme SDEP hnuaiah Fu ching tur Beneficiaries chhungkaw 12 sawrkarin a lo thlan tawh te bak Beneficiaries dang pawh thlan belh leh tum a nih thu a sawi a ni.

Agriculture Department Secretary chuan tunhnaia cheng nuai 25 senga Fu atanga Kurtai leh thildang siamchhuah te tuihnai leh man man zawka hralh a nih theihna tura sawngbawlna tur, Sugarcane Jaggery Plant chu a nihna tur ang taka hlui leh tangkai taka hman thuai a nih theih nan an mamawh hrang hrangah chak taka hmalak sak thuai an nih dawn thu a sawi a, hei vang hian Fu chingtute pawh Fu chin kawngah thahnem ngai taka tan la chho zel turin a fuih bawk a ni.

Khawlailung Sugarcane Grower Co-Operative Society Annual Assembly hi an Society Vice Chairman Laithuama chuan kaihruaiin Directorate of Agriculture atangin Deputy Director (Planning) George Lalthangura leh Serchhip DAO Tlangtimawia Zote bakah KVK North Vanlaiphai atangin Subject Matter Specialist (SMS) Kenny Zohmingliana District Co-operative Officer (DCO) L. Lalzidingi te pawhin thu an sawi a. An Society Secretary Lalhnehzauva Report atanga a lan danin Khawlailung khuaah hian Fu chinga eizawng chhungkaw 130 an awm mek a, Khawlailung Sugarcane Grower Society hi nikum July 21 khan din niin tunah hian he Society-ah hian Member/Chhungkua 81 an inziaklut tawh a ni.

Khawlailung Sugarcane Grower Society Annual Assembly-ah hian chawhnu lamah rorelna neih niin an thurel zingah an Society Member tin ten Share Rs. 500/- thawh leh theuh nise tih te, Society Member in lak belh nise tihte an rel bakah kum 2023 atan Society hruaitu thar thlanna an nei nghal bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar