Tuikum lui nu mah se Tui sem turah harsatna awm lo

Tunhnaia ruahsur avangin PHE Department in Serchhip mipui chawmna atana Tuikum lui an lakna ah Tui a nu hle a, mipuite hnenah tui sem chungchangah erawh harsatna lutuk a thleng lo thung.

PHE Department hotute chuan Tuikum lui tui an lakna hi a huamchhung a zau avangin Tuikum lui an khuahna hmunah Chirh thleng chu awm lo mah se Tui erawh a nu hma hle thung tih LENKAWL an hrilh a, Tui nut dan an tehna, Nephe-lometric Turbidity Unit (NTU)-ah 5 NTU hnuailam chu Tui thianghlim niin duhthusam erawh 1 NTU a ni tih sawiin, tunhnaia ruah a sur hian 500 NTU chunglam a ni thuai thin tih an sawi a, kumin hian Tuikum lui nut lai berin 828 NTU a ni tih sawiin, Tui an pump te hi a theih ang anga tihfim zel a nih thu leh tun thleng hian thianghlim taka an la sawngbawl zel thu an sawi a ni.

PHE Department hotute chuan hetianga Tui a nut nasat avang hian mipuite hnena sem theih tura Tui sawngbawl chu a hautak hle tih pawh sawiin, Tui tih thianghlimna atana an hmanrua te pawh a hek hle tih an sawi a, Tui te hi Pump a nih hma atanga chhawng thum (3)-a enfiah reng a nih thu leh hmanrua leh mihring tha hautak deuh mah se tun thleng chuan mipuite hnena Tui sem tur pekchhuah kawngah harsatna an la neih loh thu an sawi a ni. Hei bakah hian lui-a luanglut thei tur bawlhhlawh leh thildang, a bik takin leivung paih chungchangah fimkhur a tul thu PHE Department hotute chuan an sawi bawk a ni.