Mualcheng khua in Rajya Sabha MP K. Vanlalvena lawmna leh chawimawina hun an buatsaih

Serchhip District chhunga Mualcheng khua chuan Mizoram Member of Parliament (MP) Rajya Sabha atana an khaw mi K. Vanlalvena thlan a nih lawmna hun nimin khan khawtlang huapin ruai nen an buatsaih.


Mualcheng khawtlang in amah lawmna leh chawimawina hun an buatsaih ah hian Rajya Sabha MP K. Vanlalvena chuan an khua, Mualcheng khua in hetiang hun an buatsaih chu lawmawm a tih thu sawiin, hetianga khawtlang huap chawimawina hi a la dawn ngai loh thu leh a dawn leh tawh pawh a rin loh thu leh phu lo a intih thu a sawi a. Zirlai naupang a nih lai atanga Politics kawng a zawh chhoh dan te sawiin, MP dinhmun a ding tura ala in dah ngai loh thu sawiin, Pathian kaihhruaina zarah hetiang dinhmun hi ding a ni tih a sawi a. Mizoram mipui ten MNF Party kutah sawrkarna dahin, MLA 28 lai a neih hnuah Chief Minister Zoramthanga leh a kaihhruai Party, Minister leh MLA te avanga hetiang dinhmun a luah chu lawmawm a tih thu a sawi bawk. Sawrkar hmalakna thenkhat tarlangin, Mizoram-ah Technology thar, Thli atanga kawlphetha siam tura hmalak a nih thu a sawi a, tunah hian Mizoram in kawlphetha a mamawh san lai berin MW 110 vel a nih thu leh Mizoram atanga kan tharchhuah theih chu MW 40 vel a ni mek tih sawiin, Thli atanga kawlphetha siam tur hian Company lam te nen indawrna nei tawhin, hna pawh thawh tan thuai beisei a nih thu te a sawi bawk a ni.

Mualcheng Community Hall-a Rajya Sabha MP atana K. Vanlalvena thlantlin a nih lawmna hi Mualcheng VCP F. Lalbiakdika chuan kaihruaiin VC Member Lalhmahruaia chuan khawtlang aiawhin thu a sawi a. MP atana thlantlin a nih hnuah an khua in kawng hrang hranga hma a sawn theihna tura SAGY hnuaia Model Village atana a thlang nghal leh an khua a Tui harsatna sutkian a nih theihna tura Varva lui tui pump a nih theihna tura hma a lak sak leh tuna sum pawh a awm tawh nia sawi a ni te chu an lawm hle tih a sawi a. Ani bakah hian K. Vanlalvena pa, K. Lalzika pawhin thu a sawi bakah Serchhip atangin DRDA Project Director Malsawmtluanga, I&PR Deputy Director K. Saitluanga leh District Agriculture Officer (DAO) Tlangtimawia Zote bakah North Vanlaiphai Sub-Division huamchhunga sawrkar Department hrang hrang hotute pawhin thu an sawi bawk a ni.


Mualcheng khua hian K. Vanlalvena MP (RS) atana thlantlin a nih tirh khan a lawmna hi neih an lo tum tawh tih sawiin, amaherawh chu COVID-19 hri leng avanga punkhawmna huaihawt theih a nih loh avangin hri leng in ziaawm lam a pan hnu hun remchang hmasa ah he hun hi an buatsaih tih an sawi a. Rajya Sabha MP chawimawina atan hian an khawchhunga Bungkawn-ah chawimawina lung phunin hei hi Mualcheng VCP F. Lalbiakdika chuan a hawng bawk a ni.

Comments

Popular posts from this blog

Volleyball S/F khel dawn