Sawrkar School-ah naupang lut duh pung zelin hmun thenkhat ah Dawhkan siam belh a ngai - Education Minister

School Education Minister Lalchhandama Ralte chuan Mizoram sawrkar chuan zirna a ngai pawimawh em em tih sawiin, sawrkar School-a lut duh naupang an pung zel tih a sawi a, hmun thenkhatah phei chuan Dawhkan siam belh hial a ngai tawh tih a sawi bawk.

Mizoram Middle School Teachers Association (MSTA) kum 25 tlinna, Silver Jubilee lawmna Aizawl Zarkawt-a MSTA Office, Teachers Inn-a neih a hmanpuina ah he thu hi sawiin School Education Minister Lalchhandama Ralte chuan Mizoram sawrkarin zirna a ngaipawimawh em em tih a sawi a, hri leng avanga sum lama harsatna an tawk chung pawhin zirna in hma a sawn zel theih nan kawng hrang hrangin hmalak a ni tih sawiin, thawktu pawh mi 2000 chuang lak an ni tawh nghe nghe tih a sawi a. Tunah pawh sawrkar School-ah naupang lut duh an pung chho zel nia sawiin, hmun thenkhatah phei chuan an Dawhkan te siam belh hial a ngai a ni, a ti.

School Education Minister chuan COVID-19 hrileng karah pawh zirna kawnga hmalak a nih theih nan Zirtirtuten anmahni sum pawh seng hreh lovin kawng hrang hrangin hma an la thin chu lawmawm a tih thu leh chhuanawm a tih thu he hunah hian a sawi a, zirna in hma a sawn zel theih nan hma an lak chho zelnaah pawh MSTA te chu thurawn te pe a, finchhuah zel turin thawhpuiah a sawm nghal bawk a ni.

Education Minister Lalchhandama Ralte chuan hripuiin a ti buai chung pawhin bahlah miah lovin zirna kawnga an hmalakna ah harsatna tawk lovin a hun takah result an tichhuak thei thin leh Mid-Day Meal pawh khaihlak miah lova sem chhunzawm a ni thei thin chu lawmawm a tih thu a sawi bawk a ni.

MSTA Silver Jubilee lawmna ah hian Education Minister hian Silver Jubilee hriatrengna lungphun chu a hawng nghal bawk a ni.

He hunah hian MSTA General Secretary C. Lalchhanhima’n report pe-a a tarlan danin Mizoram-a Middle School Zirtirtu intelkhawmna pawl, MSTA-ah hian Mizoram pumah Member 1376 an awm a, nimin-a kum 25 an tlin lawmna ah hian an pawl hruaitu hlui chawimawina hun hman a ni bawk.

Comments

Popular News (Last 30 Days)

Vawiin-ah HSSLC Exam result

LPG man bithliah thar