Latest News

MBSE in kumin a HSLC Exam result tichhuakin zirlai exam zingah za zela 70.64 ten an pass

Mizoram Board of School Education (MBSE) chuan kumin-a pawl 10, High School Leaving Certificate (HSLC) Exam result chu nimin khan tichhuakin Exam hmachhawntu zirlai 17,417 atangin mi 12,304 in hlawhtlinna an chang a, Exam beitu atanga chhutin za zela 70.64 te chu an pass a, zirlai Fail vekna School 15 a awm bawk.


MBSE in nimin-a HSLC Exam result a tichhhuah atanga a lan danin kumin hian Exam tura inziaklut zirlai mipa 8724 leh hmeichhia 9633, an vaiin 18,357 an awm a, heng atang hian Exam lo mi 940 zet awmin zirlai mipa 8226 leh hmeichhia 9191, an vaiin 17,417 te chuan Exam hi an hmachhawn a, heng atang hian zirlai mipa 5913 leh hmeichhia 6391, an vaiin 12,304 te chuan hlawhtlinna an chang a, Exam beitu zingah mi 4928 te chu Fail inComparmental Chance nei mi 185 an awm bawk a, zirai Exam atanga chhutin za zela 70.64 te chu an pass a ni.

Kumin a HSLC pass thar 12,304 zinga 1437 te hi Distinction-a pass niin 1st Division-ah 3716, 2nd Division-ah 4309 leh 3rd Division-ah zirlai 2842 an pass a, Top 10-ah zirlai 17 langin a pumpui-ah Dinsawmkimi D/o Lalhmachhuana, St. Joseph Higher Secondary School leh Lalramdina Ralte, St. Paul's Higher Secondary School te pakhatna an ni a, anni hian Mark 500-ah Mark 484 an hmu a, Top 10-ah hian St. Paul's Higher Secondary School, Aizawl atangin zirlai 8 langin St. Joseph Higher Secondary School, Aizawl atangin 4, Mount Carmel School, Aizawl atangin 3, Hermon School, Aizawl leh Holy Cross School, Thuampui Aizawl atangin zirlai pakhat ve ve an lang a, Aizawl pawnlam an lang lo thung.

Nikum-a HSLC Exam result chhuak nena khaikhinin kumin hian pass percentage hi nasa takin a tlahniam a, nikum lamah zirlai exam zinga za zela 82.43 lai an pass laiin kumin hian 70.64% an pass a, kum 5 kalta chhutin kumin aia result chhiat tum hnih (2019-ah 67.93% leh 2020-ah 68.33%) awmin kumin aia result that hi tum thum (2017-ah 74.86%, 2018-ah 76.65% leh 2021-ah 82.43%) te a awm a ni.

Kumin hian Management-wise ah Deficit School zirlai titha berin 88.39% an pass a, hetihlai hian Govt. School atangin 58.12% an pass thung a, Lumpsum School atangin 68.18% leh Aided School atangin 62.79% an pass a, Private School atangin 79.79% an pass bakah Private Candidate 51.11% an pass bawk a. Zirlai pass vekna School 98 awmin Fail vekna School 15 a awm bawk a ni.

Comments

Popular News (Last 30 Days)