Mizoram-ah International Museum Day hman a ni

Mizoram State Museum, Art & Culture Department chuan nimin khan ‘International Museum Day’ hmangin he ni pual hian tunkar Zirtawpni thleng khian Mizoram State Museum chu en man awm lovin tlawh theih tura hawn a ni ang.

International Museum Day puala Mizoram State Museum in hun an hman hi Museum Curator PC. Zosangpuii chuan kaihruaiin Art & Culture Department Joint Director Carol VLMS. Dawngkimi chuan khuallian niin a hmanpui a, Mizo hnam lo dinchhuah zelna tur leh kan hnam inpumkhat zelna turin kan nihna dik kan hriat chian a ngai tih a sawi a, chumi atan chuan Museum hian chakna tam tak min pe thei tih a sawi bawk.

Khawvel puma Museum hrang hrangten ni bik, mahni remchan ang theuha a ruala an hman tlan turin Inter-National Council of Museum (ICOM)-in kum 1977 khan May 18, 2019 chu ‘International Museum Day’ atan a puang a, kumin hian khawvel pumhuapa International Museum thupui atan ‘The Power of Museum’ tih thu hman a ni a, Ministry of Culture, Govt. of India chuan India Zalenna Kutpui (Azadi Ka Amrit Mahotsav) lawmna atan India ram pumah ‘A Week Long Celebrations for International Museum Day’ buatsaihin May 20, 2022 (Zirtawpni) thleng hian Mizoram State Museum chu en man awm lovin hawn a ni dawn a ni.

Mizoram State Museum hian 2019-2020 sawrkar kum chhung khan tlawhtu mi 19971 an nei a, heng zinga mi 8 hi VIP an ni a, foreigner visitors mi 79 an nei bawk.