Cancer hemna khawl – Brachytherapy Machine hawng

Mizoram State Cancer Institute-a Cancer hemna khawl chi khat – Brachytherapy Machine bun thar chu Inrinni khan Health Minister Dr. R. Lalthangliana chuan a hawng.

Brachytherapy Machine hawnna hunah hian Health Minister chuan Mizoram-ah Cancer vei kan tam avangin kawng tinrengah tanlak a ngai tih sawiin, ei leh in uluk leh fimkhur te, zuk leh hmuam lama fihlim a pawimawh thu bakah taksa insawizawi a tul zia te kan hriatsa vek ni mahse hriselna kawngah heng te hian nghawng thui tak an neih avangin a pawimawh reng a ni, a ti a. Hmanni lawka Cancer hemna khawl changkang tak, Linear Accelerator hman theih tura hawn leh tuna Brachytherapy Machine thar hian MSIC chu a tichangtlung hlein Cancer damlo te tan damna an chan theihna tur kawng thar nia a ngaih thu a sawi a, khawl bun thar pan ngai erawh a tlem thei ang ber nei ila tih chu duhthusam a nih thu a sawi bawk.

Health Minister chuan Japan International Agency Cooperation (JICA) tanpuina leh an sum puk hmanga sak beisei hei aia lian leh changtlung zawk,Cancer Superspeciality Hospital din turah Sawrkar laipui phalna leh a kaihhnawih tihfel ngai khirkhan tak tak te chu chinfel a nih tawh thu sawiin, tunah chuan JICA leh Mizoram Sawrkar inkar a ni tawh a, JICA lamin an sawi dan chuan he Hospital hi kum 2028-ah sak zawh hman an beisei a, a tira hemi atan sum ruahman cheng vbc. 500 chu tunah chuan tisang in, cheng vbc. 660-ah san a ni tawh a ni, a ti.

Brachytherapy khawl bun thar hi cheng vbc. 3.02 man niin Varian Medical Systems, USA siam a ni a. MSCI-ah hian tun hmain Channel 3 awmna Brachytherapy khawl company dang siam hman a ni thin a, Channel thum nei a nih avangin Cancer a hem theih pawh a tlem a. Tunah khawl thar hi chuan Channel 24 a neih avangin Cancer chi hrang hrang a hem thei a, a enkawl theih pawh a tam sawt dawn a, Cancer vei enkawlna kawngah a tangkai hle dawn tih sawrkar thuchhuah chuan a tarlang a ni.

Tarlan tawh angin nikum September khan MSCI-ah Cancer hemna khawl lian leh changkang tak India hmunpui ah te pawh an hman ber Truebeam Linear Accelerator (LINAC) chu Chief Minister Zoramthanga’n a hawng a. He khawl leina leh a chah thlenna atan hian cheng vbc. 17 chuang sen niin a dahna hmun tur leh thil dang a ken tel te nen chuan cheng vbc. 22 hu vel nia chhut a ni. LINAC hian taksa pawn atangin boruak kaltlangin Cancer a hem a, Brachytherapy khawl erawh chuan Cancer hi hnaite emaw, a cancer awmna lai emaw depin a hem a. Barchytherapy hi a bik takin Prostrate Cancer, Chhul Cancer Cervical Cancer, Ka chhung Cancer, Aw bawm leh hnar bulhnai Cancer nasophrayrnx Cancer-ah te a tangkai hle a ni.