NGO ten Doctor sawn tum chungchang an sawiho

Serchhip NGO Coordination Committee chuan Serchhip-a Doctor thawklai sawnchhuah chungchanga an thilphut te chu Health Minister hnenah thlen nise an ti.

Serchhip-a tlawmngai pawl hrang hrangte intelkhawmna, NGO Coordination Committee hi nimin chawhnu khan Ser-chhip Sub-Hqrs. YMA Meeting Room-ah an Chairman leh Serchhip Sub-Hqrs. YMA President Kawlthuama kaihhruaiin an thukhawm a, he hunah hian tunhnaia Serchhip District Hospital atanga Doctor te sawnchhuah chungchang sawihoin Serchhip-a naupang lam thiam Doctor awm mek, Dr. K Vanlalhriati a thlaktu tur dah lova sawn a ni chu pawi an tih thu sawiin, a aiawh tur dah a nih hma loh chuan sawnchhuah an remti lo tih an sawi a. Serchip District Hospital-a thawklai Dr. C. Lalrinzama thu leh awm hma Serchhip-a awm zui rih tura tih a ni pawh an ngaih a ngam lo tih sawiin, Serchhip District Hospital-a awm nghet tura Order tichhuak turin sawrkar chu an ngen bawk a ni.

Serchhip NGO Coordination Committee chuan heng an thilphut te hi Health Minister hnenah an thlen dawn thu sawiin, tunah hian an hruaitu thenkhat te pawh Aizawl lamah an awm mek thu an sawi a. An thilphut te tih hlawhtlin a nih loh chuan Doctor sawnchhuah turte pawh lo chhuah tir lo tura Serchhip District Hospital thuneitute an ngen dawn thu sawiin, a tul anga hma an lak zui zel tur thu an sawi bawk a ni.