DAN HNUAIA FA LAK (ADOPTION)

DAN HNUAIA FA LAK (ADOPTION)

- Liansangpuii

 Protection Officer (Non-Institutional Care)

 District Child Protection Unit,

Serchhip District

Fa lak kan tih hi Mizote zingah thil thar a ni lova, tunhma atanga lo practice tawh niin Dan mumal tak hnuaia tih erawh a ni ngai lova. Dan hnuaia mumal taka kalpui anih theih nan kum 2003 khan Social Welfare Department chuan Adoption Cell dinin hmalakna neih tan a ni a. Dan kan tih hian naupang pual bil Dan, Juvenile Justice (Care and Protection of Chilcren) Act kan sawina a ni a, JJ Act tia sawi mai thin a ni. JJ Act in thuneihna a pek angin Mizoram Juvenile Justice (Care and Protection of Children) Rules 2003 chu July ni 30, 2003 khan Mizoam Gazette-ah chhuah a ni a, a chhuah ni atanga hman tan tura tih a ni. Danpui ber (JJ Act) hi siamthat anih apiangin State Rules pawh hi siamthat a ni ve thin. He dan in naupang a tihte chu kum 18 la tlinglo te niin, JJ Act hian a tum pawimawh tak chu naupang a bika enkawl leh venhim ngaite Home-a dah lova Adoption, Sponsorship leh Foster Care hmanga chhungkaw enkawlna hnuaia thanlen tir a ni.

He Dan hian Adoption tih dan tur hi mumal takin a duang a, fa adopt tur hian tehna hrang hrang a awm a, uluk taka zirchianna neih hmasak phawt thin a nih bakah naupang pawh adopt a nih theih nan tihfel tur chi hrang hrang a awm bawk. JJ Act 2015 hman anih hnuah Adoption inkaihhruaina pawh hi Govt. of India in siamtha ve in Adoption Regulations, 2017 tih a ni a, hei hi 16th January 2017 atang khan kan hmang tan a, Guidelines 2015 thlakin a aia khauh zawk leh thunei zawk a ni. Regulations 2017-ah hian thil thar, Relative Adoption leh Step Parent Adoption te belh niin online lamah hman theih a ni tawh bawk.

The Juvenile Justice (Care and Protection of Chidren) Act, 2015 a Section 80 in a sawi angin mimal emaw, pawl emawin he Dan hnuaia inkaihhruaina duan ang ni lova fahrah (orphan) emaw, hlamchhiah (abandoned) emaw fa atana pek (surrendered child) emaw, an lo zuar (offer) emaw, pe (give) emaw, la (receive) emaw a nih chuan chutiang titu chu kum thum thleng tantir emaw, cheng nuai khat thleng chawitir emaw, a pahnih emaw a hrem kawp theih a ni.

Naupang chu amah hringtu a nu leh paten an thihsanin emaw, an thlahthlamin emaw, an enkawl theih lova midang lak theih tura an pe (surrender) emaw anih chuan midangin Dan hmangin fa atan an la thei a, hei hi Adoption kan tih chu a ni. Dan chuan Adoption chu fahrah, hlamchhiah leh surrendered naupangten an dikna leh chanvo chhungkua ah an chan ve ngei theihna hmanrua atan hmantur a ti a. Adoption-in a tum bulpui ber chu heng naupangte hian Dan hmanga kumkhuaa an chhungkaw nghet tur zawnsak hi a ni. Hei hian naupang leh a adopt-tute inkarah inlaichinna nghet, dikna chanvo, hamthatna leh mawhphurhna, fahrin ten an chan ang zawng zawng a kengtel a ni. He Dan hnuaia Adoption tih chu naupang leh a adopt-tute tan a him em em a, tuma sawibuai theih a ni lo. 

Mizoram-ah JJ Act hnuaia adoption hi kum 2005 atang khan mumal taka kalpui niin, kum 2005 atanga November, 2020 thlenga naupang adoption a pekchhuah tawh zawng zawng chu Ramchhung (In-Country) ah 302 leh Rampawn (Inter-Country) ah 49, an vaiin 351 a ni a. August ni 1, 2015 atang khan India ramchhung leh pawn atanga Indian naupang adopt zawng zawng chu online system hmang veka tih ngai a ni tawh a. Mi tupawh naupang adopt duhte chuan mahni awmhmun atangin awlsam takin online registration tiin naupang adopt duhna state kha thlan theih a ni. Seniority list hmun khatah India ram puma naupang adopt duhte chu awmin a senior dan indawta naupang pek thin an ni. Hei vang hian Mizoram naupangte pawh State chhung mai nilo, State dang leh India ram pawn thlengin mi tupawh Danin nau adopt thei tehna a siam ah a tlin chuan an adopt thei tihna a ni. In register duh harsatna nei te chu Specialized Adoption Agency, District Child Protection Unit, State Adoption Resource Agency office ah te puih thin niin pan theih reng an ni bawk.

Dan hnuaia Fa lak (Adoption) hi Mizote zingah fa neilo te chauhin an tih tur ni a ngaihna a awm thin, hei hi a that viau rualin mi tupawh mahni fahrin pathum aia tlem nei emaw, nupui/pasal neilo, tehna danga tling apiangte tan fa lak hi a theih a, mipa nupui neilo tan erawh hmeichhe naupang lak phal a nilo thung. Kan sawi tak naupang chhungkaw neilo tana chhungkaw zawnsak hi a tum ber anih avangin intihhmuh ila, kan sakhuana nen pawh hian a inhmeh em em a ni. Tin, naupang kan thlan danah pawh hian nau hrisel leh pianthate chauh thlang lo hian, rilru leh taksa lama harsatna nei naupangte pawh hi hmangaih taka enkawltu chhungkua mamawh hlei hlei an ni tih hria in, an tan tha leh zung sen inhuam ila, hma kan sawnna zel tur a ni awm e.

Khawtlang ah hma kan sawn a, hemi rual hian fa lak chungchanga kan rilru put dan ah pawh hian hmasawn ve zel ila,miin hmangaih taka an fa atana an thlan Dan hmanga an lak naupangte chungchang thudik tawklo leh fa lak anni tih te lo va sawisak chhen hi thil tullo kan tih loh tawp tur a ni. Naupang hi an duhthlan reng vang ni lovin khawvelah an lo piang a, an nu leh pate khawloh vang emaw, vanduai vang emaw a thisen zawmpui hauhtu/enkawltu dang an neilo anih pawhin, nu leh pa, chhungkua nei lovin an awm tur a ni lo. Naupang dang ang bawk a nu leh pa, chhungkaw neih hi danin an dikna chanvo a pek a ni.

Naupang pakhat fa atana ilo lak (Adopt) avang khan khawvel a danglamlo a ni thei, mahse chu naupang tan chuan a khawvel zawng zawng a danglam vek thung dawn a ni tih hria in a thei leh tlin apiang te chuan Adoption hi intihmuh ila, uar sauh sauh ang u.


Dan hnuaia fa lak( Adoption) hi hmangaihna atanga chhuak, a kawng erawh Dan hmanga hlenchhuah ngai a ni.

Comments

Chhiar Hlawhte

North Vanlaiphai Village Council-ah inthlanna neih that leh a tul dawn