Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

Chanchin thar thenkhat :

 Khawpui fai endik tan dawn

Mizoram Khawpui Fai Intihsiakna endiktu, Panel of Experts te chu nimin khan Aizawl a UD&PA Office atangin UD&PA Director, H. Lianzela hovin vailiam an ni. Mizoram Khawpui Fai Intihsiakna ah hian District Hqrs. 11- Aizawl, Champhai, Hnahthial, Khawzawl, Kolasib, Lawng-tlai, Lunglei, Mamit, Saitual, Serchhip leh Siaha te chu Category-I ah awmin Mizoram-a Town Area 12 - Bairabi, Biate, Darlawn, Khawhai, Lengpui, N. Kawnpui, N. Vanlaiphai, Sairang, Thenzawl, Tlabung, Vairengte leh Zawlnuam te chu Category-II ah an awm a, Category pahnih ah hian khawpui fai thlanna neih a nih dawn bakah ‘Khawpui Fai Ber’ (Overall Cleanest Town) chu heng khaw 23 atang hian thlanchhuah a ni bawk ang. Khawpui Fai Intihsiakna result hi Cleanliness Competition neih zawh, January ni 26, 2021 (Republic Day)-ah puan a ni ang.


Sample Test tam dan tur rel

Nimin khan Medical Operational Team Chairman, Dr. ZR. Thiamsanga MLA hovin Directorate of Hospital & Medical Education Conference Hall-ah COVID19 sample test tam lehzual neih a nih theih dan tur sawiho a ni a, he Meeting-ah hian Aizawl khawpui chhunga hmun remchang, awlsam taka sample test theihna tur Kiosk buatsaih dan tur sawiho a ni a, a duh apiang tan Covid-19 test theihna hmun tur ruahman mek a nih thu leh hei hi chak taka kalpui mek a nih thu tarlan a ni a. Test man pawh a tlawm thei ang bera tihdan tur rawtna chhawpchhuah niin hei hi Sawrkar pawm-puina la tura thlen a ni ang. Kan hmalawka hunpui Krismas leh Kumthar hmuah dan chungchang pawh he hunah hian sawiho niin rawtna siamin sawrkar ah thlen nise an ti bawk.


MPCC Vice President bang

Mizoram Pradesh Congress Committee (MPCC) Vice President nilai, H. Liansailova chuan tunhnai khan a nihna atanga banna a thehlut a, Presbytery-ah Moderator a nih dawn avanga banna hi thehlut niin kan thudawnna chuan a sawi.


PC Party in CM an phut

PC Party chuan Tripura-a Zofâte chenna, Zampui tlangdung leh a chhehvela Tuikuk-te inbenbelna tura ruahmanna kal mek ah Mizoram Chief Minister chu ral thlir mai lova harsatna su-kiang tura che chhuak tura an phut thu an sawi.


MZP leh MJA inkawmna nei

MZP General Hqrs. hruaitute leh MJA General Hqrs. hruaitute chuan nimin khan Ai-zawl-a MZP Pisa Pui-ah inkawmna an nei a, he hunah hian Assam State awpna hnuaia awm, Zofa hnam hrang hrang inzawmkhawm (Hrang-khawl, Chorei, Molsom, Ranglong, Sakachep) in an din, Thangram Indigenous Peoples Movement hruaituten an ngenna angin kan unaute duhdan leh mamawhna te bawhzui sak nise tih a ni. He inkawmhonaah hian ram leh hnam tana thawhho zel dan tur leh hmalak ho zel dan turte pawh sawiho a ni bawk.


LADC inthlan atan inbuatsaih

Thla thar December 4-a Lai Autonomous District Council (LADC) bial 25-a MDC thlanna neih tura hming pelut te tana inhnuhdawh theih hun nimin tlai-a khar-ah inthlanna chuh tuma hming pelut zingah 23-Sekulh MDC Constituency-a Independent-a chuh tum, Malsawma Bru chu inhnukdawkin, LADC Inthlanpui, 2020-ah hian chuhtu (candidate) 72 an awm dawn ta a ni. He inthlanna neih tur atan hian inbuatsaihna ngawrh taka kalpui zel niin nimin khan inthlanna a hman tur EVM enfiahna hmasa ber neih niin EVM hman tur 140 te chu thlan fel a ni.

Comments

Chhiar Hlawhte