Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

I&PR Director in MJA hruaitute a lawmpui

Information & Public Relations Department chuan MJA General Hqrs. hruaitu thar te lawmpuina hun nimin khan buatsaihin I&PR Director, Lallianpuii MIS chuan MJA General Hqrs. OB leh Executive Member te chu lawmpuina leh duhsakna a hlan.

I&PR Auditorium-a he hun hmanna ah hian I&PR Director chuan sawrkar leh a bik takin I&PR Department hmalakna hrang hrangah MJA-ten theihtawpin an lo thlawp thin avangin lawmthu a sawi a. Kumin ah COVID-19 hripuiin khawvel pum a tibuai tih sawiin, Mizoram-ah ngei pawh sawrkarin hmachhawp tha tak tak nei mahse hripui a la len zel avangin hmalak a har hle a, a lungchhiatthlak takzet a ni, a ti a. Covid hripui a len laiin ramri buaina a lo awm belhchhah bawk nen, hetiang hunah hian ram chhung leh ram pawna miten an hriat theih turin chanchinthar lakhawmtu media-ten thudik an puanzar chak a tul hle a, hemi kawngah Mizoram media-te chu tun aia nasain tan la turin a fuih bawk a ni.

He hunah hian MJA General Hqrs. President, Zonunsanga Khiangte chuan I&PR Department chu Mizoram Media-te tan ‘Inpui’ a ni tih sawiin, MJA nena thawhhona tha tak neih chhunzawm a ngaih pawimawh zel tur thu a sawi a. Kumin March thla khan MJA General Conference leh hruaitu thar thlan tura ruahmanna siam vek tawh ni mahse, Covid hripui len tak avangin an thulh vek thu leh District MJA-te nen inrawnin hun hmasaa MJA hruaitute bawkin kum 2020-2022 chhung pawh an nihna chelh zawm turin lungrual takin an rel thu a sawi bawk.

Comments

Chhiar Hlawhte