Mizoram Lok Sabha MP in Mizoram BSNL-a hnathawkte ramri lam ngai pawimawh turin a chah

Telecom Advisory Committee (TAC) ruat thar a nih hnua thutkhawm hmasa ber chu nimin khan Lok Sabha MP, C. Lalrosanga hova neih niin Lok Sabha MP chuan Mizoram BSNL hnathawkte chu ramri lam ngai pawimawh turin a chah.

Nimin a Aizawl-a Telecom Advisory Committee (TAC) thutkhawm ah hian Mizoram Lok Sabha MP, C. Lalrosanga chuan Mizoram leh ramdang – Myanmar leh Bangladesh inrina hmunte chu inbiakpawhna lam tih changtlun a tul thu sawiin, chutiang bawkin thenawm State-te nena ramri-ah inbiakpawhna tha leh changtlung zawk ruahman a tul a ni, a ti a. Mizoram-ah BSNL chuan hma thar nasa taka a lak a beisei thu leh, hun rei tak General Manager awpna hnuai a an awm tawh loh hnua General Manager thar, Arun Kumar a lo awm ta chu lawmawm a tih thu leh ani kaihhruaina hnuaiah hian hmasawnna nasa tak a beisei thu a sawi a. Hripui leng leh sum harsatna kan tawh mek laia BSNL Staff ten thahnemngai taka an hna te an thawhna leh inpekna avangin Staff te chu fakawm a tih thu a sawi bawk a. Sum leh hnathawk chungchanga harsatna an neihte chu amah leh Rajya Sabha MP, TAC Member ni bawk, K. Vanlalvena te hnenah inthlahrung hauh lova thlen hreh lo tura chahin, anni’n sawrkar laipui leh state sawrkar thuneitute hnena an lo bawhzui thin tur thu a sawi bawk.

He thutkhawm ah hian Rajya Sabha MP, K. Vanlalvena pawhin mimal enkawl Mobile Service chhiatna hmun kilkhawr apiang luhchilh turin BSNL hotute chu a ngen a. Ramri a insum-dawntawnna tura ruahman hmunah te inbiakpawhna tha zawk ruahman turin a ngen bawk.

Telecom Advisory Committee (TAC) thutkhawm ah hian TAC Member te chuan Mizoram-a District thar 3-te chu ngaih pawimawh nise an duh thu an sawi a, Mobile Tower hman tlak tawhloh te chu hman tlak a siam a nih loh chuan senghawi mai ni se tiin rawtna an siam bawk a ni.

Mizoram BSNL hian General Manager hi rei tak an nei tawh lova, Lok Sabha MP in sawrkar laipui thuneitute a nawr avangin tunhnai khan an rawn dah leh a. Tun dinhmunah BSNL hian telephone pangngai hmangtu 10,026 a nei a, Mobile Phone hmangtu 2,35,466 an awm bawk a. Nikum lawk atanga an kalpui thar internet chak chi, FTTH pawttu pawh 5,123 zet an awm tawh a ni.