Theihai lui-a NH. 54 kawng kual zauh a ni dawn

Serchhip Leisang Veng-a NH. 54, Theihai lui kawrh kam-a kawng kual ulh lutuk chu Serchhip-VII Village Council hmalakna in laihzauh a ni dawn.

Serchhip khawpui chhung paltlangtu NH. 54 siamthat hna thawh mek denchhenin Serchhip-VII Village Council te hian an huamchhung, Serchhip Leisang Veng-a VL. Zuala Chawngthu te kawt-a kawng kual ulh lutuk, motor kal vel tan pawha insut palh hlauhawm tak chu laihzauh a ni dawn a, nimin khan Serchhip-VII VC te hian kawng laihzauhna tur kawngchhak lam thenfai hna hi thawkin tunkar chhung hian hna thawh tan hman an beisei thu an sawi a ni. 

Serchhip-VII VC te chuan Serchhip khawpui chhung kawngpui siamthat mekah tunlai hi kawngsir zauh ngai zualpui leh leimin thenfai ngai te thenfai hun remchang nia an hriat thu sawiin, hemi atan hian an huamchhung ah a theih anga hma an lak thu leh hemi atan hian he kawngpui enkawl mektu, National Highways and Infrastructure Development Corporation Limited (NHIDCL) te pawh an dawr thu an sawi a, tunah hian helai kawng kual zauh a nih theihna tur pawh hian anni lam hian khawl an rawn tum sak dawn thu an sawi a, Theihai lui-a Tuikhur awm mek tichhe lo chiahin kawngpui hi zauh tum a nih thu leh he hna hi an zawh hunah chuan helai kawng kual, lirthei tan pawha hlauhawm tak hi ziaawm tawh tura an beisei thu an sawi bawk.