Chanchin thar thenkhat :

Kumthar-ah School tan tum

Mizoram-a School hawn hun atan kumthar January 15 chu tinzawn a ni. Nimin khan School Education Minister, Lalchhandama Ralte hovin a Pisa-ah School Education Department hotuten School hawn dan tur te, Syllabus chungchangte leh Examination kalpui dan turte an sawiho a. He thutkhawm a tel te hian Thlasik-ah hrileng a zual hlauhthawnna a awm avangin kumin 2020 chhung chu School hawn tawh rih loh nise tiin, School luh hun atan January 15, 2021 tinzawn a ni a, School luh theih hun tur hi State Executive Committee-ah la thlir zui leh a ni dawn a ni. December 18, 2020 thleng leh January 5-14, 2021 chhung chu Online Class chhunzawm zel nise tih an rel bawk. Hostel-a awm mek naupang te chu Dec. 11,2020 ral hmain Hostel atanga chhuahtir vek nise, Hostel-a luh leh hun tur chu Hostel neituten sawrkar thuchhuak lo ngaichang se an ti bawk. Hei bakah hian School kal theih loh avang hian Syllabus hman mek chu India ram-puma kalpui angin zaa 30 a tihtlem a ni a, Board Exam hun atan April 2021 an ruat bawk.

Sawrkar-ah Report thehlut

Mizoram Samagra Shiksha-a thawkte din-hmun zirchiang tura din, Study Group te chuan nimin khan School Education Minister, Lalchhan-dama Ralte hnenah an report an thehlut. Study Group report-a a lan danin Samagra Shiksha-ah hian SSA Teacher 2326 leh RMSA Teacher 517, an vaiin 2843 an awm a, sawrkar enkawl School-a zirtirtu awm zawng zawng atanga chhutin Sa-magra Shiksha-a thawkte hi zaa 19.2 an tling a ni. Federation of Mizoram Samagra Employees (FEMSE) chuan an hlawh leh dinhmun siam-that phutin  nikum kum tawp lam khan Mass Casual Leave an la a, sawrkar nen inbiakna an neih hnuah an hlawh leh Service dinhmunte enchiang turin Study Group din nise tih a ni a, hemi ang hian Study Group hi K. Sangthuama Joint Secretary School Education  Department kaih-hruaina hnuaiah din a ni ta a ni.

ZPM Thalai ten an ngen

ZPM Thalaite chuan nimin khan thuchhuah siamin Sawrkar fawng vuantu MNF Party chu Opposition MLA beih chu hna pui bera nei tawh lo tur leh, Zoram leh a chhunga cheng retheihna leh harsatnain a delh beh mêk te chu kaichhuak zawk tûrin an ngen tih an tarlang.

Tlawng-ah ruang chhar

Nimin chawhnu khan Tlawng lui, Thenzawl leh Buarpui inkar Lei atanga lui hnar lam KM 10 velah mipa ruang pakhat, Tui-a rawn lang chhar a ni a, Police ten an enfiah hnuah Mangdingliana S/o Lalzuala, Sialsuk Vengchhak a ni tih hriat niin a ruang hi Sialsuk-ah lak a ni.

Board in hmalakna thlirho

Sports, Youth Affairs, Tourism & ICT Development Board chu niminpiah khan an Chairman Sports Minister, Robert Romawia Royte hovin Secretariat Conference Hall-ah an thukhawm a, he Board hnuaia awm Department 3- Tourism, Sports Department leh ICT Department-a hmalakna te thlirin lawmawm an tih thu an sawi a, an hmachhawp an thlirho nghal bawk.