‘Khuangchera Project : Huaisen inzirtir’ hawn a ni

Mizoram Youth Commission (MYC) buatsaihin, ‘Khuangchera Project : Huaisen inzirtir’ programme chu Zirtawpni zan khan HYVE Aizawl City Hall-ah hawn a ni.

‘Khuangchera Project : Huaisen inzirtir’ programme hi I&PR Minister, Lalruatkima chuan khuallian nia hmanpuiin MYC Moral Reforms hmalakna peng pakhat ‘Khuangchera Project : Huaisen inzirtir’ hawn a ni ta chu lawmawm a tih thu sawiin, rah tha a chhuah ngei a beisei thu a sawi a. MYC chu thalaite hmathlir tipuitlingtu, leirem an rah nana kawng tinrenga hma la thintu an ni tih sawiin, an hlutna mipuiin kan hriat a pawimawh tih a sawi bawk.

He hunah hian MYC Chairman, Dr. Vanlaltanpuia MLA chuan Mizoram Youth Commmission-in ram leh khawtlangin rilru kan puthmang a tha zawnga kaihhruai an tum thu sawiin, chuta hmalakna peng pakhat atan ‘Khuangchera Project : Huaisen Inzirtir’ chu kalpui an nih thu a sawi a. Pasaltha hming hrang hrang chawiin project hrang hrang -Taitesena, Khuangchera, Vanapa, Chawngbawla leh a dangte kalpui an tum thu a sawi bawk. MYC Chairman chuan Mizote rilru-a bet tlat huaisenna chu hnam in a ngaihlu a, thalaite zingah huaisen inzirtir thar leh a tul nia an hriat thu a sawi bawk. He hunah hian Serlui bialtu MLA, Lalrinsanga Ralte pawhin thu a sawi bawk a ni.