Mizoram-a mi cheng te rilru kan inkharkhipna phelh hmasak a tul - MP, Rajya Sabha

Mizoram Rajya Sabha MP, K. Vanlalvena chuan kawngpui leh Tui-ah Mizoram chu ramdang tana tlawhpawh harsa a ni lo tih sawiin, ami chengte zawk hi kan rilru tlawhpawh harsa a nih avangin rilru lama kan inkhar-khipna hi phelh a tul hmasa tih a sawi.

Mizoram Rajya Sabha MP, K. Vanlalvena hian nimin khan Aizawl-a a chenna, Legislator's Home-ah MJA General Hqrs. OB leh Exxecutive Member thar te lawmpuina hun a buatsaih ah he thu hi a sawi a, Rajya Sabha MP chuan Mizoram chu ram thenkhat angin landlock a ni lo tih sawiin, ramdang nena inkalpawhna thui tak nei ram kan nih bakah ram ruak tha tak nei kan la ni tih a sawi a. “Landlock nia kan inhre tlat hi kan rilru zawk a ni a, kan rilru lock tu hi kan huikian a ngai,” tiin thil tih hlawhtlin dawn chuan thinlung lam atangin a hlawhtlinna tura bul lo tan hmasak a ngai tih a sawi bawk.

Rajya Sabha MP chuan MP thar mai a nih avangin khawr tak chung leh tih tur chin leh chin loh pawh thliar thiam vek lovin, Mizoram leh Hnam tan sutkuak tur awm nia a hriat chu a su ve pawp pawp tih pawh sawiin, tunhnaia ruahtui khawl lama hmun hmingthang Rajasthan ami chu Union Minister of Jal Shakti, GS. Shekhawat-a ruahmanpuina-a a tlawh hnuah Mizoram-a Tui lakna harsa deuh khuate tana ruahtui dahkhawlna project siam rawtna chu Mizoram sawrkar PHE Department-in project siamin hei hi Ministry lamah a bawhzui leh dawn tih a sawi bawk.

Mizoram-a ramhmul damdawi siamna Industry din tura Central lam hotute a ngenna chu tunhnai khan an rawn chhang tih pawh sawiin Rajya Sabha MP chuan hetiang Industry hi chu anni chuan khawi State-ah mah an la din ngai loh a nih rualin, ramhmul damdawi atana siam theihte sawngbawlna tur - Processing Unit erawh an dinsak theih thu leh, Unit khat tan cheng nuai 400 zel an tumsak theih thu in an rawn chhang tih a sawi a. Hei pawh hi Mizoram sawrkar hotute tul tih dana bawhzui theih tur a nih thu a sawi bawk.

Hei bakah hian Environment tichhe si lova eizawnna leh hmasawnna hna thawh theihna tur tam tak ruahmanna chu a awm tih sawiin K. Van-lalvena chuan, Sawrkar hotute nen tangho in a tul anga bawhzui zel a tum thu a sawi a, heng zingah hian tute tan pawha an eizawnna pangngai baka mitin in sum an lakluh theihna, Khuai khawi chu project lian zawk siam theih nia a hriat thu a sawi a. Kan Lui tui pawh tuna Lawng tenau hmanga duhtawk ngawt lovin, Lawng lian zawk kal theihna tura siam a, sumdawnna lian leh hlawk tham kalpui theih tura ruahman a tul thu te a sawi bawk.

Rajya Sabha MP chuan MJA hruaitute ngenna angin MJA member-te tan Defence Tour buatsaih a nih theih nan a tul anga bawhzui a tum thu a sawi a. Journalist-ten harsatna dang an neih an sawite pawh a theih ang anga Delhi lama bawhzui ngaite chu bawhzui a inhuam tih a sawi bawk.

He hunah hian MJA General Hqrs. President, Zonunsanga Khiangte chuan Rajya Sabha MP-in hetiang hun a buatsaih chu lawmawm a tih thu sawiin, a tul anga thawhho zel an inhuam thu a sawi bawk.