Latest News

Chanchin thar thenkhat :

Dy. Speaker in Sialhau tlawh

Tuikum bialtu MLA leh Assembly Spea-ker, Er. Lalrinawma chuan Inrinni khan a bial chhung Sialhau khua tlawhin MLA Fund hmanga Tui lakna siam dan tur a enpui. Assembly Deputy Speaker, Er. Lalrinawma hian Sialhau-ah hian MLA Fund hmanga tui lakna, khawl hmanga tui pump-na tur a hmunah a enfiah ah, bialtu MLA chuan Tui chu kan nitin nunna hnar ber a nih avangin Sialhau khaw tana Tui lakna tur chu amah pawhin a ngaih pawimawh thu leh theihtawp a chhuah thu sawiin, Sawrkar Department te nen pawh theihtawp chhuaha an thawh thu leh hun reilote ah hman theih tura an peihfel tur thu a sawi a. Khawtlang mipuite chu MLA Fund hmanga Tui pump chhuahna tura hmalakna kal mek ah theihtawp chhuaha tawiawm tur leh thawhpui turin a sawm a, heng khawtlang tan an tuilakna tur an siam mek te hi mitin ten mahni ta anga en a, roh thiam turin a chah bawk.


Chief Minister in Airport tlawh

Chief Minister, Zoramthanga chuan Inrinni khan Lengpui Airport tlawhin Airport siam that hna thawh mek a en a, Chief Minister hian Airport hungna te, lirthei dahna hmun te, Terminal Building pawn-a chawlhna hmun te, Airport Apron Extension hna thawh mek te, Isolation Parking Bay, Baggage make-up area leh Runway zul-a tui luankawr siam te a enfiah a, a chhehvela tui-luan kawr siamthat ngaite pawh a en bawk a ni.


Lei siamthat enchhin a ni

Mizoram leh Tripura inkalpawhna kawnga Lei, Kanhmun leh Damcherra inkara mi chu chei that anih hnuah Inrinni khan hlawhtling taka en-chhin a ni. Tunhnaia ramri-a buaina thleng avanga Assam nena inkalpawhna khar a nih atang khan Tripura nena inkalpawhna kawng siamthat hna hi Mizoram sawrkar chuan chak takin a thawk a, he hmalakna kal zelah hian he Lei hi Inrinni khan enchhin a ni ta a ni. He Lei hi ft. 260-a sei niin Metric Ton 20 dawl zo tura siamthat niin Lei hi a chak tha ah ngaih a ni.


Mi 73 in hming pelut

December ni 4, 2020-a Lai Autonomous District Council (LADC)-a MDC inthlan lo awm tura chuh tumte hming pek hun chu Zir-tawpni tlai dar 3:00 khan a tawp a, MDC bial 25-a inthlan chuh tur hian hming pelut  mi 73 an awm a ni. MNF party-in bial awm zawng zawng 25 chuh turin hming an pelut a, Congress party-in bial 14-ah hming pelutin  BJP-in bial 17-ah chuh turin hming an pelut bawk a, Independent-a chuh tum mi 17 an awm bawk. He inthlanna chuh tura hming pekluh te hi Zir-tawpni khan enfiah nghal niin hnawl an awm lova, inhnukdawk duhte tan Vawiin tlai dar 4:00 thleng hun hawn zui a ni ang.


Ramri-a sumdawnna tur tlawh

Mizoram Assembly Speaker, Lalrinliana Sailo leh Rajya Sabha MP, K. Vanlalvena bakah MNF Vice President, Vanlalzawma te chuan Inrinni khan India leh Myanmar (Burma) te insumdawntawnna (border trade) tura kawngpui hnathawh mekna hmun, Saisihchhuah an tlawh a, hemi hmalam hian Zorinpui pawh an lo tlawh tawh bawk a ni. Sai-sihchhuah hi Mizoram lamah chuan Pangkhua in a hnaih ber a, Pangkhua atang hian KM 7-a hla a ni. He hmunah hian, India leh Burma inrina Chhim-tuipui a luang a, Saisihchhuah hi Myanmar lamah chuan kawngpui zau tak in pawh tawhin Mizoram lam atanga kawngpui tha zawk a tlang theih nan tunah hian hmalak mek a ni bawk.

Comments

Popular News (Last 30 Days)