Awas Diwas-ah Mizoram atangin RD Minister a tel

Nimin khan Union Rural Development Minister, Narendra Singh Tomar hovin State hrang hranga Rural Development enkawltu Minister te chuan Video Conferencing kaltlangin ‘Awas Diwas’ an hmang a, Mizoram atangin Rural Development Minister, Lalruatkima pawh a tel a ni.

Nimin-a ‘Awas Diwas’ hmanna ah hian Mizoram atanga tel RD Minister, Lalruatkima hian Pradhan Mantri Awas Yojana-Grameen (PMAY-G) hnuaia Mizoram hmalakna te tarlangin, Pradhan Mantri Awas Yojana-Grameen hnuaia chhungkaw 26,594 te chu Permanent Waitlist (PWL)-ah an awm a, chung zinga chhungkaw 9587 te chu remanded niin mi 3411 te chu an dilna hnawl hrih (rejected) an ni a, chuta tang chuan he Scheme hnuaia tanpuina dawng thei (Eligible beneficiaries) te chu chhungkua (household) 13,596 an nih thu a sawi a. Heng chhungkaw 13,596 atang hian chhungkaw 10,349 te chu register an nih tawh thu te, chhungkaw 7239 te chu sanctioned an nih thu te leh sanction tur 6357 an la neih thu te a sawi lang bawk.

Minister chuan RD Ministry-in an ruahman hun chhung ngeia PWL te sanction tih fel chu Department in a bawhzui mek tih sawiin, hemi atan hian theihtawp chhuah mek a nih thu a sawi a. Target bituk atangin chenna In 3829 te sak zawh a nih thu leh chenna In 9767 chu sak mek a nih thu te pawh a sawilang a ni. Dilna hnawl tawh te endik leh hna Re-Verification te pawh thawh leh mek a ni tih sawiin, PMAY-G hlawhtling taka zawh a nih thei nan chak takin hma lak mek a nih thu a sawi bawk.