CMRF for COVID-19 a nihna anga hmang turin ngen

Mizoram Pradesh Congress Committee (MPCC) chuan Chief Minister's Relief Fund for COVID-19 chu COVID-19 avanga harsatna tawk te tanpui nana hman an duh thu an sawi.

Inrinni khan thuchhuah siamin COVID-19 hripui leng avangin Mizoram-in hun harsa tak a tawk mek tih tarlangin, COVID-19 vei mi 3500 chuang zingah chhungkaw tam takin harsatna an tawh phah thu leh Lockdown vawi tam tak kalpui a nih tawh avangin chhungkaw tam tak eizawnna in a tuar nasa hle nia tarlangin, sum leh pai harsatna nasa tak a thleng chho mek tih an sawi a.

Hetiang karah hian sawrkar hnathawk Association hrang hrang te, NGO-te, Kohhran leh mimal inpe tak tak ten Chief Minister's Relief Fund for COVID-19 ah pawisa vbc. 22 chuang an thawhkhawm tawh nia sawiin, “Heng pawisa te hi a hming ang tak hian harsatna tawkte chhawm-dawl (relief) na tur a ni a, COVID-19 vanga harsatna tawkte tanpuina atana thawhkhawm a ni. Chuvangin, tuna CM Relief Fund vaibelchhe engemawzat awm mek hi COVID-19 vei mekte enkawl nan te, Lockdown avanga eizawnna chhiat phah ta chhungkaw tam tak tanpui nan te a rang thei ang bera hman nise tih hi Congress Party  duh dan a ni,” an ti.

COVID-19 avanga Mizoram in hun khirh tak a tawn laia CM Relief Fund hman a nih dan ah Mizoram mipui an lung a awi lo hle a ni tih a chiang nia tarlangin MPCC thuchhuah chuan, harsatna tawk mipuite tanpuina atana hmang lo a sawrkar insensona tur awm ngawih ngawiha ngaih, khawl leh Test Kit lei nana CM Relief Fund vaibelchhe tam tak hman a nih avangin mipui in CM Relief Fund-ah pawisa an chhunglut tha duh tawh lo niin an tarlang a. Thla 3 chhung leka vbc. 20 an thawh tlin theih laiin, tunhnaiah erawh a pung chak tawh lo hle niin an tarlang bawk.