Latest News

Hri kai 35 hmuh belh leh

Mizoram-ah hri kaichhawnna hriat mumal loh-a COVID-19 hri kai an tlahniam zel a, nimin-piah-a Mizoram-a Sample enfiah atangin COVID-19 hri kai 35 hmuhchhuah an ni.

Niminpiah khan ZMC Laboratory-ah Sample 371 enfiah niin COVID-19 hri kai 5 hmuh a ni a, District hrang hranga TrueNat Laboratory-ah Sample 302 enfiah niin hri kai 10 hmuh an ni a, hei bakah hian Rapid Antigen Test hmanga Sample 881 enfiah atangin hri kai 20 hmuhchhuah an ni bawk.

Niminpiah a ZMC Laboratory atanga hri kai hmuhchhuah te hi Maubawk leh Aizawl Chanmari atangin mi 2 ve ve leh Zokhawsang atangin mi pakhat an ni a, an vai hian State pawn atanga rawn lut vek an ni. TrueNat Laboratory-a hri kai hmuhchhuah mi 10 te pawh hi State pawn atanga rawn lut vek niin an vai hian Serchhip District-a hri kai hmuhchhuah an ni a, an zinga mi 8 te hi PTS Thenzawl-a Mizoram Police te niin midang 2 hi Dawngzawl-a awm BSF Sipai an ni a, tunhnaia Bihar inthlanpui-a Duty-a kal te an ni.

Niminpiah a Rapid Antigen Test hmanga hri kai hmuhchhuah mi 20 zinga mi 16 te hi Lawngtlai District-a hri kai hmuhchhuah an ni thung a, an vai hian hri kai tawh te atanga tual-chhunga hri kaichhawng an ni bawk. Heng bak hri kai hmuhchhuah pali te hi Aizawl khawpui chhung ami te an ni thung a, Durtlang, Chaltlang Lily Veng, Zotlang leh Dawrpui Vengthar-ah mi pakhat theuh niin an zinga pahnih te hi hri an kaina hriat a ni lova, hri kai zingah hian Traffic Police pakhat telin hri a kaina hriat a ni lo bawk.

Mizoram-a COVID-19 hri kai hmuh tawh chu 3745 niin heng zinga 3319 te chu enkawl dam an ni tawh a, tunah hian hri kai enkawllai 421 an awm bawk a, hri kai zingah nunna chan mi 6 awm tawh mah se sawrkar lam chhinchhiahna ah chuan mi 5 nia tarlan a ni thung.

Comments

Popular News (Last 30 Days)