Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

MGNREGS atan kumin chhungin cheng nuai 51513.4028 hmuh a nih tawh

State Employment Guarantee Council thutkhawm chu nimin khan Rural Development Minister, Lalruatkima hovin Video Conferencing hmanga neih a ni a, he hunah hian Ministry of Rural Development atangin MGNREGS atan kumin chhungin cheng nuai 51513.4028 hmuh a nih tawh thu tarlan a ni.

State Employment Guarantee Council thutkhawm ah hian RD Minister, Lalruatkima chuan COVID-19 hripui lengin sum dehchhuah a tithuanawpin rampum-ah sum leh pai dinhmun a nghawng nasat thu a sawi a. Thingtlang-a chengte leh thingtlanga sum veivir pawh nasa takin a nghawng tih sawiin, ni 100 inhlawhna, MGNREGS chu tun dinhmunah thingtlang mipuite innghahna ber a nih tak thu leh an dinhmun chawikangtu pawimawh tak a nih thu a sawi a. SEGC thutkhawm chu hripui a len avangin kumdang angin a hun taka neih theih a nih loh thu a sawi bawk.

Kumin ah hripuiin nasa taka min nuai avangin kumthar lamah chuan ei leh barah harsatna kan tawk dawn nia a lan thu Minister chuan sawiin, hei vang hian MGNREGS atanga hmalakna tur reng rengah ei leh bar tharchhuah tihpun leh hemi kawnga hmasawnna chu uar ni se a ti a. Tunhnaia State hrang hrang te hmalakna thlirhonaah Mizoram chu MGNREGS bikah State thawk tha berte zinga a tel thu sawiin, hei hian hnathawktute thawhrimna leh inpekna a tihlan thu leh nasa lehzuala tan la turin thawktute a chah a. Meeting-a tel te hnenah thawhhona tha tak an neih chhunzawm zel a beisei thu leh sawrkar finchhuaha thurawn te pe thin turin a ngen bawk.

He thutkhawm a tarlan a nih danin kumin hian Ministry of Rural Development atangin MGNREGS atan cheng nuai 51513.4028  hmuh a ni tawh a, hemi atanga State Matching Share chu cheng nuai 2078.8228 a ni. October thla thleng khan chawhrualin District tinah ni 74 vel inhlawhna hi siam a ni tawh a, November leh December thla ah te ni 7 ve ve inhlawhna hi siam tum a ni. 

Job Card holder zawng zawng atanga chhutin za zelah 95.14 chu ni 8 chhungin an account-ah an hlawh a lut thin a, kumin atana hna thawh tur 19000 atangin 15000 chu thawh zawh tawh niin e-FMS pawh za a za tihhlawhtlin a ni tawh a. Job card holder 96.56% chu MIS ah an Aadhar nen thlunzawm tawh a nih laiin 32.82% chauh an bank account leh an Aadhar thlunzawm a ni thung.

Comments

Chhiar Hlawhte