Latest News

Kum thum kalta chhungin Mizoram-ah TB vei nunna chan an pung chho mek

Kumin January thla atanga September thla tawp thleng khan Mizoram-ah TB natna vei 1996 hmuhchhuah niin hemi chhung hian TB vei zingah nunna chan mi 37 an awm a. Tunhnai kum thum (2018-2020) chhungin Mizoram-ah TB vei leh TB vei nunna chan hi an pung chho mek niin a lang.

National TB Elimination Programme Mizoram atanga report-a a lan danin kumin (2020) January atanga September thla chhung khan Mizoram-ah TB vei mi 1996 hmuhchhuah an ni a, heng TB vei hmuhchhuah mi 1996 zingah mi 189 te hi HIV positive bawk niin TB vei zinga mi 139 te hi TB pangngai aia tihdam harsa, MDR-TB (Multi Drug Resistant) an ni thung. Mizoram-a TB kai hmuhchhuah hi tunhnai kum thum chhung hian an pung chho zel niin a lang a, kum 2018 khan Mizoram-ah TB vei mi 2499 hmuhchhuah niin kum 2019-ah TB vei mi 2833 hmuhchhuah an ni bawk a, kumin hian Report ala luh kim loh avangin Mizoram dinhmun tur hi ala hriat loh a ni. 

Hei bakah hian Mizoram-a TB vei zingah hian MDR-TB pawh he kum thum chhung hian an pung bawk a, nikum chhung khan Mizoram-ah MDR-TB vei mi 132 hmuhchhuah niin kum 2018 khan mi 104 hmuhchhuah an ni bawk.

Kum thum kalta chhunga Mizoram-a TB vei leh MDR-TB kai an pun rual hian TB vei zingah nunna chan pawh an pung ve bawk a, kum 2018 khan Mizoram-ah TB vei zingah nunna chan mi 24 awmin kum kalta ah mi 29 an awm bawk a, kumin hian thla 9 chhung hian TB vei zingah nunna chan mi 37 an awm tawh a, COVID-19 vanga thihna nen khaihkhinin TB vanga thihna hi a sang hle tih thudawnna chuan tarlangin, tuna Data thar berah chuan Mizoram-a COVID-19 hri kai 3823 niin nunna chan chu mi 5 an ni thung.

National TB Elimination Programme Mizoram thawktute chuan Taksa khawi lai pawh a TB theih avangin natna hriatchhuah vat-a enkawl vat a pawimawh tih an sawi a. Tunlaiin hri leng avangin inentirna kawngah mipui tam takin harsatna an tawk tih pawh sawiin, TB hmuh-chhuah leh TB vanga thi a pun reng avangin TB inentirna kawngah mipui te an harhthar a ngai takzet tih an sawi bawk.

Comments

Chhiar Hlawhte