Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

Education Department-a thawktute hmalakna vangin Achievement Award an dawng tih sawi

School Education Department Director, James Lalrinchhana chuan School Education Department-a Zirtirtute leh thawktu ten hri leng kara hma an lakna avangin School Education Department chuan InSPA atangin chawimawina, Achievement Award a dawng tih a sawi.

Mizoram Middle School Teachers' Association (MSTA) Councillors’ Meeting Vawi 12-na nimin-a Synod Conference Centre, Aizawl-a neih a hmanpuina ah he thu hi sawiin School Education Department Director chuan, hripui leng mek COVID-19 dona kawnga School Education Department hmalakna huangchhungah Zirtirtute leh thawktu dangten sum leh pai thahnem tak Chief Minister's Relief Fund-ah chhunglutin Ambulance te pek a ni bawk tih a sawi a, hei bakah hian ramri leh mahni awmna khua leh veng theuhva zirtirtute tha thawh chu chhuanawm a tih thu a sawi a. Hripui leng vanga zirna In hawn mumal theih a nih loh avangin zirlaiten rilru lama harsatna an tawh loh nana zirtirtuten an zirlaite an kaihhruai theih nan Primary School, Middle School, High School leh Higher Secondary School zirtirtute tan School Education Department leh Indian School Psychology Association (InSPA) tangdun chuan Online Workshop te buatsaihin zirtirtu 1000 chuang an tel a, hripui leng kara a hmalakna avang hian School Education Department chuan InSPA atangin chawimawina, Achievement Award a dawng tih a sawi a ni.

School Education Department Director chuan hripui leng vanga zirna kal mumal theih loh karah School Academic Session 2020-2021 pawh nakum (2021) April thleng pawtsei tura ruahmanna siam a ni tih sawiin, sawrkar ruahmanna hrang hrangte thlawpa kan ram leh hnam tana tha ber tur ngaihtuah chunga Pathian in a hunna ah theuh lawm chunga mawhphurhna hlen chhuak zel turin zirtirtu kalkhawmte chu a chah a. Nu leh pa ten an rohlu, an fate an kut-a an dah avangin an enkawl tura Pathian a pek zirlaite tan theihtawp chhuah tur leh, eizawnna leh hlawh hmuhna mai ni lo, rawngbawlna an kova innghat a nih avangin Missionary rilru pu-a theihtawp chhhuah thar turin zirtirtute chu a fuih bawk a ni.

Nimin-a MSTA Councillors' Meeting-ah hian Mizoram hmun hrang hrang atangin MSTA hruaitu 35 an tel a. MSTA-ah hian Mizoram puma Middle School 669 atangin Member 2589 an awm a, Aizawl-ah General Hqrs. neiin Joint Hqrs. 2 leh Sub-Hqrs. 13 a nei a ni.

Comments

Chhiar Hlawhte