DGP in Cyber Crime Police Station a hawng

Mizoram Police hnuaia Cyber Crime Police Station chu Zirtawpni khan Police Headquarters (PHQ), Khatla-ah Mizoram DGP, SBK. Singh chuan a hawng.

Internet kaltlang inbumna leh pawikhawihna lam thubuai a punchhoh tak avangin May ni 21, 2014 khan post siam belh awm lovin SP CID (Crime) hnuaiah, Cyber Crime Cell tiin din a ni a. August 2018 khan Cyber Crime Police Station puitlingah Sawrkar-in a hlangkai leh a, he Cyber Crime Police Station atan hian Sawrkar-in Sub-Inspector (B) posts panga (5) chu kum 2019 khan a siambelh bawk a ni. Mizoram-a Cyber Crime Police Station hawnna hunah hian DGP chuan mipui ten ngaihngam taka Cyber Crime Police Station an belh theihna tura hmala tur an ni tih sawiin, “Khawvel-a Police tha ber in ni thei. Technology thang zelah in-update a, in-upgrade a pawimawh, hemi ti tur hian thiamna a pawimawh rualin mitin te kan pawimawh a ni,” a ti.

Cyber Crime Police Station hian Cyber Crime Cell a nih lai atangin case 11 an ziaklut tawh a, Charsheet 8 nei tawhin tunah hian Pending lai case pathum an nei a. Complain hrim hrim hi 133 dawng tawhin, heng zinga 122 chu chhui zui an ni a, complaint 72 te chu chhui chhunzawm tlak lovah ngaiin chhui hmabak 61 an nei mek a ni. He Police Station hian Mizoram pum huapin thuneihna a nei a, tupawh Cyber Crime lama harsatna nei chuan englai pawhin lungawilohna an thehlut thei reng a ni.