Latest News

DCPU huaihawtin Naupangte Ni bik pualin Serchhip-a Children's Home-ah hun hman a ni

District Child Protection Unit (DCPU), Serchhip chuan nimin khan Zoar Urban Deprived Children’s Home leh Unity Orphanage Home-a naupangte nen ‘Children's Day’ leh ‘World Day for Prevention of Child Abuse’ pualin hun an hmang.

Kum 2000 khan Women's World Summit Foundation (WWSF) chuan November ni 19 chu ‘World Day for Prevention of Child Abuse’ atan puangin, November ni 20 hi United Nation in ‘Universal Children's Day’ tiin kum 1954 atang khan naupangte hamthatna tur leh naupang te dikna leh chanvo mipui ten an lo hriat lehzual theih nan kumtin a hmang thin bawk a. Hei bakah hian India ram ah chuan Prime Minister hmasa ber, Pandit Jawaharlal Nehru piancham leh Naupangte zirna leh dikna chanvo humhim nan tha a thawh nasat zia hriatreng nan November ni 14 chu ‘National Children's Day’ ti a vuahin kum 1956 atang khan hman thin a ni bawk a. Heng te pual hian nimin khan hun hi hman a ni.

Khawvel puma naupangte Dikna leh chanvo humhimna leh naupangte kawng tinreng a hma an sawn theihna tur leh venhim an nih theihna atana heng ni bik te hi kumin hian COVID-19 hri leng avangin kumdang anga programme lian tham leh naupangte intihhlimna buatsaih theih a nih loh avangin District huamchhunga Children's Home pahnih – Zoar Urban Deprived Children's Home leh Unity Orphanage Home-a naupangte tan hun hman niin, ICPS hnuaia District Child Protection Unit, Serchhip thawktuten an hmanpui a. Zoar Urban Deprived Children's Home-ah hian naupang mipa 5 leh hmeichhia 6 awm mekin, Unity Orphanage Home-ah hian naupang mipa 5 leh hmeichhia 2 an awm mek bawk a ni.

Naupangte tana heng an ni bik pual hian mitin in ngaihtuahna seng thara, tu leh fa, naupang te tan kan theihtawp chhuah thar theuh tur leh a tul anih chuan mithiamte pawh rawn hrehlo turin DCPU-a thawktute chuan mipuite an sawm a. Khua leh tui tha kan nih theih nan naupangte enkawlna tha pek chu mitin ten kan mawhphurhna a ni tih hria a, tu leh fa te nen inpawhna tha tak nei-a chhungkaw hlim tak indin zel tura tan la turin District Child Protection Unit, Serchhip chuan mipuite thawhpuiah an sawm a ni.

Comments

Popular News (Last 30 Days)