Mizoram-ah COVID-19 hri kai hmuhchhuah tlen zel

Zirtawpni-a Mizoram-a Sample enfiah atangin COVID-19 hri kai mi 18 hmuh belh an ni a, Inrinni-a sample enfiah atangin hri kai 16 hmuh niin hri kai hmuhchhuah hi an tlahniam mek a ni.

Zirtawpni khan ZMC Laboratory-ah sample 485 enfiah niin hri kai mi 8 hmuh an ni a, District hrang hranga TrueNat Laboratory-ah Sample 233 enfiah niin hri kai pakhat hmuh a nih bakah Rapid Antigen Test hmanga Sample enfiah 729 atangin hri kai 9 hmuhchhuah a ni bawk a, heng hri kai hmuhchhuah mi 18 te zinga mi 10 chu tualchhung-a hri kaichhawng niin midang 8 chu State pawn atanga rawn lut an ni thung.

Inrinni khan ZMC Laboratory-ah Sample 269 enfiah niin hri kai mi 4 hmuh an ni a, District hrang hranga TrueNat Laboratory-ah Sample 154 enfiah niin hri kai mi pakhat hmuh niin Rapid Antigen Test hmanga Sample enfiah 635 atangin hri kai 11 hmuh an ni bawk. Inrinni a hri kai hmuh mi 16 zinga 7 te hi State pawn atanga rawn lut an ni a, mi 6 te chu tualchhung-a hri inkaichhawng niin midang pahnih chu hri kaina hi chhui mek a ni thung. Inrinni-a hri kai hmuhchhuah 16 zinga mi 3 te hi Bihar inthlanna a Duty BSF Sipai pahnih leh Mizoram Police mi leh sa pakhat an ni a, Mizoram Police mi leh sa hi Rapid Antigen Test leh TrueNat-a enfiah a nih hnua hri kai lo, inkhunghranna hun hman zawh a nih hnua taksa-a hri kai lanchhuahna a neih avanga enfiah zui a nih hnua hri kai hmuh leh a ni. Lawngtlai District-ah hri kai mi 5 hmuh belh leh niin tualchhung-a hri in-kaichhawng an ni a, Aizawl-ah hri kaina hriatloh mi 2 an awm bawk.

Heti hian nimin thlenga Mizoram-a COVID-19 hri kai  hmuh tawh chu 3823 niin hri kai enkawl dam 3440 an awm tawh a, tunah hian hri kai enkawllai 378 awm tawhin hri kai zingah nunna chan mi 5 an awm tawh nia chhinchhiah a ni bawk.