Mipui ten man tlawm zawka thlai an lei theih nan Vegetable Market Chain kalpui turin hmalak a ni

Agriculture Minister, C. Lalrinsanga chuan mipui ten thlai tharchhuah man a tlawm zawk theih nan Vegetable Market Chain kalpui turin hma an la mek tih sawiin, hemi atan hian Aizawl chawmtu khaw hrang hranga loneitute chu Society anga kaltir tum an nih thu a sawi bawk.

AIR Correspondent in a kawmna ah Agriculture Minister, C. Lalrinsanga chuan thlai tharchhuahna kawnga a thawkrim ber loneitute aia kharchhawng hovin uchuak tak taka thlai man an tisang chu tha a tih loh thu sawiin, thlai man uchuak taka a kharchhawng ho in an tihsan thin chu a reh theihnan Vegetable Market Chain kalpui an tum thu leh tunah hian ruahmanna kalpui mek a nih thu a sawi a, “A kalphung tur duan mek a ni a, peihfel a nih hnuah thlirho-a chak taka kalpui tum a ni,” a ti.

Thlai-a Aizawl chawmtu khaw hrang hranga loneitute chu Vegetable Market Chain hnuaiah hian Society anga kaltir tum an nih thu sawiin Agriculture Minister chuan, “Sawrkarin tul leh mamawh an neih te a theih ang angin a pui dawn a. Thlai man bithliah thlengin sawrkar chuan a enpui ang,” a ti a, loneitute hlawkna tur si, thlai man tlawm tur siin thlai man bithliah thin tum a nih thu a sawi bawk. Aizawl khawpui chu North leh South-ah then a ni dawn tih pawh sawiin, North lam hi MIZOFED-in vilin, South lam chu Mizo-ram State Agriculture, Horticulture and Marketing Cooperative Federation (MAHFED)-in an vil thung anga. Anni hian loneituten a zuar turte hnenah thlai an hralhna an enpui anga, a zuartute zawrh dan thlengin an vilzui dawn a ni, a ti a. Society hnuaiah thil felfai takin kalpui tum niin, a tul a nih chuan MIZOFED leh MAH-FED hian thlai an leisak dawn tih a sawi bawk.

Agriculture Minister, C. Lalrinsanga chuan kharchhawng ho in hlep neia thlai an kharchhawng chu a that lohna a hriat loh thu sawiin, chutihrualin to uchhuak lutuka an ti thin chu thalo hle a hriat thu pawh a sawi a, hlep an neih chu a awm a, mahse uchuak taka an tih thin chu tihbo an tum ber a nih thu a sawi a, mipuite chu thlai to uchuak lutuk chu lei lo ngam turin a ngen bawk.