Champhai Leilet humhalh dan tur sawiho a ni

Nimin khan Land Revenue & Settlement Minister, Lalruatkima leh Law & Judicial Minister leh Champhai South bialtu MLA ni bawk, TJ. Lalnuntluanga te hovin Champhai Town Area huamchhunga leilet humhalh chungchang hmalakna kal mek leh hmalak zel dan tur sawiho a ni.

He sawihona hun Revenue Minister Pisa-a neih ah hian Agriculture leh Land Revenue & Settlement Department hotute telin Revenue Minister chuan Sawrkar-in leilet a siam theih ram a ngaipawimawh tih sawiin, Agriculture Department ten hemi kawngah nasa takin hma an lak tan thu a sawi a, Rural Development Department pawhin hei hi tul tiin ni 100 inhlawh kaltlangin buh leh bal tharchhuah tihpun theih nan Contour Terracing te siam anih thu a sawi a. Champhai Town Area chhunga leilet, WRC ram hi settlement atana hman anih chuan Mizoram buh leh bal tharchhuah a nghawng thei a, chuvangin helai hmun hi dan ang thlapa humhalh tha a tih thu a sawi a. Chutih rualin WRC area hi enfel a tul thu leh helai ram hman dan chungchangah Sawrkar hriattirna (notification) thar chhuah a tul thu te pawh a sawi bawk.

He hunah hian Champhai South bialtu MLA, TJ. Lalnuntluanga pawhin hmasawnna kal zelah leilet siam te hi hlawk lo mahse intodelhna atan leh tharchhuah tihpun kawngah a pawimawh em avangin humhalh a tul mai bakah siam belh zel pawh Sawrkar ngaihpawimawh a nih thu a sawi a. Tunah Champhai Town Area huam chhunga leilet te hman dan mek dan enchian a, chumi dungzuia Dan ennawn tur a awm chuan siam that a, chu Dan chu tha tak a kenkawh tha a tih thu te a sawi tel bawk.

He thutkhawm ah hian hemi chungchang zirchiang tura ruat Task Force te thil hmuh dan leh an thlen chin chu Task Force Chairman, Agriculture (Crop Husbandry) Director Rohmingthanga Colney chuan tarlangin, Town area chhunga leilet Department record-a hectare 730 anga chinchhiah chu teh that leh mek (demarcate) a nih thu te, leilet ram a Kudam leh Permanent structure te chu a bik takin Zotlang, Zote, Tlangsam Road leh Tuipui hnar lam ramah te a tam thu a tarlang a. Champhai DC in hemi kawnga hmalakna a neih tawh te pawh he hunah hian tarlan a ni bawk. Task Force Report hi tun thla ni 27-a a luh fel hnuah Department pahnih ten he thil hi ennawn a, chumi dungzuaia a tul anih chuan ram hman dan inkhuahkhirhna chungchangah hriattirna chhuah thar leh an rel a ni. 

Champhai bakah North Vanlaiphai leh South Vanlaiphai ah te pawh hetianga hma lakna neih tha an tih thu he thutkhawm ah hian tarlan a ni a, Champhai Town area huam chhunga Leilet ram te hi Cham-phai Master Plan te nen pawha enmil a tul thu pawh he hunah hian tarlan a ni bawk.