Latest News

Thenzawl-ah hri danna pe tan; ni 2 chhungin mi 306 te hri danna pe tawh

Serchhip District-a COVID-19 Vaccine pek mekah nimin khan Thenzawl CHC-ah hri danna hi pek tan ve leh a ni a, he hun hi Thenzawl SDO (C), Kulothungan A, IAS chuan hmanpuiin sawrkar ruahman anga Vaccine lak runpui India ramah kalpui a ni leh Thenzawl-ah pawh kalpui theih a ni chu lawmawm a tih thu sawiin, Vaccine chuan mipui himna a thlen ngei a beisei thu a sawi.

Serchhip khawpui chhung kawng siamtha mek

Serchhip khawchhung paltlangtu National Highway-54 chu tunlai hian Serchhip hmarlam, Chhiahtlang atanga tanin thawmthat hna thawh mek a ni.

National Highway-54 kawngpui laih-zauh leh siamthat hna Japan International Corporation Agenmcy (JICA) hnuaia thawh mekah Serchhip khawpui chhung chu NH. 54 in a paltlang tawh dawn loh avangin Serchhip khawpui chhung kawngpui KM 14.4 a thui siamthat hna hi tunlai hian thawh mek a ni a, heng kawng siamthatna atan hian cheng vbc. 153.1 ruahman niin Ser-chhip khawpui hmarlam, Chhiahtlang atanga tanin KM 2-a thui siam a nih hnuah chhimlam atanga tan leh tura ruahman a nih thu he hna thawktute chuan an sawi a ni. Kawngpui siamthat hna an thawh mek hi Inches 4-a chhahin chhun a ni a, a chungah hian Inches khat-a chhahin Sealcoat phat leh tur a nih thu thawktute chuan an sawi.

NH. 54 laihzauh leh siamthat hna thawh mekah hian Khumtung leh Keitum inkar hi National Highways and Infrastructure Development Corporation Limited (NHIDCL) hnuaiah Gammon India Ltd. chuan an thawk a, an hnuaiah hian Prem Kram Company leh Sri Gidaji Infra Height (SGIH) te chuan khawpui chhung kawng siamthat hna hi thawk chawng ve leh in, kawngpui luan that mek chu endik nghal zel a ni bawk. Kawngpui siamthat hna thawktute chuan lirthei kal vel leh ruahsur avanga an hnathawh mekah harsatna an neih loh thu an sawi bawk.

National Highway-54 Khumtung leh Keitum inkar thawmthat leh laihzauh hna thawh mek hi Gammon India Ltd. hotute chuan kum 4 chhunga zo hman turin NHIDCL nen an inrem tih an sawi a, amaherawh chu hripui a len avanga hna thawh theihloh hun a tam tak avangin kum khat dang hun pekbelh an ni tih an sawi a, hri leng avang hian Serchhip khawpui chhung kawngpui thawmthat hnathawh mek pawh an zawh hun tur an hriatloh thu an sawi a ni.

Comments

Chhiar Hlawhte