BSF Sipai hri kai hmuh belh

Niminpiah-a Serchhip District-a Sample enfiah atangin COVID-19 hri kai mi 9 hmuh-chhuah an ni a, an vai hian BSF Sipai, State pawn atanga rawn lut an ni.

Niminpiah khan Serchhip District-a TrueNat Laboratory-ah Sample 38 enfiah niin heng atang hian COVID-19 hri kai mi 9 hmuhchhuah an ni a, heng hri kai hmuhchhuah te hi mipa vek niin BSF Sipai, Bihar inthlanna a Duty-a kal, tun thla ni 13-a Serchhip District-a rawn hawn leh Thenzawl-a Tribal Girl's Hostel Quarantine Centre-a inkhunghrang lai an ni a, an zingah hian taksa-a natna hri kai lanchhuahna nei an awmlo a ni. Helai hmuna awm zingah hian a hma lamin hri kai pakhat hmuhchhuah a ni tawh bawk a ni.

Hetihlai hian Serchhip District-a CO-VID-19 hri kai enkawl zingah nimin khan mi pakhat chu hri laka a fihlim hnuah anmahni enkawlna hmun atanga chhuahtir a ni a, he hri kai enkawl dam hi tun thla ni 14-a hri kai hmuh-chhuah niin Tantia Construction Company hnuaia thawk, West Bengal atanga rawn haw a ni.

Heti hian nimin thleng khan Serchhip District-ah COVID-19 hri kai hmuhchhuah chu mi 142 an tling ta a, an zinga mi 93 te chu enkawl dam ni tawhin tunah hian hri kai enkawllai 49 an la awm mek a, District dang atanga hri kai enkawl tur rawn dah nen tunah hian Serchhip District-ah hri kai enkawllai mi 53 an la awm mek a ni.