Latest News

North Vanlaiphai Village Council-ah inthlanna neih that leh a tul dawn

Serchhip District chhung North Vanlaiphai Village Council inthlanna a lungawilohna nei ten an lungawilohna an thlen chu ngaihtuah a nih hnuah State Election Commission-ah Report thehluh a ni tawh a, State Election Commission chuan North Vanlaiphai Village Council-ah hian inthlan that a tul dawn tih an sawi.

Kumin August 27-a North Vanlaiphai Village Council inthlanna neih zawh takah thil fello a awm nia an hriat avanga mi 15 ten State Election Commission-a lungawilohna an thlen hnuah November 18, 2020 khan heng lungawilohna thlen te ngaihtuah tura ruat, Election Tribunal kaihhruaina hnuaiah an lungawilohna thlen te hi ngaihtuah a ni a, he inthlanna a Vote tla te chhiar that a nih hnuah thil fello a awm ngei tih finfiah a nih avangin inthlanna hi neih that leh a ngai dawn nia thudawn a ni. State Election Commission-a Secretary, Teresy Vanlalhruaii chuan he inthlanna a lungawilohna thlen te ngaihtuahtu, Election Tribunal chuan nimin, Nov. 20, 2020 khan an thil hmuh dan chu State Election Commission-ah hian an thehlut tih sawiin, Election Tribunal hian inthlanna neih zawh tak chu ‘rintlakloh’ a tih avang leh Election Tribunal thutlukna hi Dan-ah thutawp a nih avangin, Election Tribunal thutlukna bawhzui hian State Election Commission chuan inthlanna a buatsaih leh a ngai dawn tih a sawi.

State Election Commission-a Secretary chuan Election Tribunal in inthlanna neih tak chu ‘rintlak loh’ an tih avangin hemi chungchang hi chhui zui tur a nih thu a sawi bawk a ni.

Tarlan tawh angin kumin August 27-a Vilage Council inthlanpui neih ah khan Serchhip District chhung, North Vanlaiphai Village Council-a inthlanna neih ah thil fello tam tak a awm nia hriain he inthlanna a ZPM Candidate 4, Independent Candidate leh INC Candidate pakhat bakah ZPM Agent 3, Independent Agent pahnih leh INC Agent pakhat, an vaiin mi 15 te chuan State Election Commission-ah he inthlanna a Vote tla te hi chhiar tha leh turin ngenna an thehlut a, hemi ang hian tunkar Nilaini khan Vote tla te hi chhiar that niin hetah hian Ballot Paper then-khat chu hmuh tur awm tawh lo a, hei vang hian inthlan that hi a ngai dawn ta a ni.

Comments

Popular News (Last 30 Days)