Chanchin thar thenkhat :

Lehkhabu thar tlangzarh

School Education Minister, Lalchhandama Ralte chuan nimin khan ‘Duhlian tawng Mizo tawng’ tih lehkhabu C. Lalhluna ziah chu a tlang-zarh. He lehkhabu tlangzarhna hun a Pisa-a neih ah hian School Education Minister chuan C. Lalhluna’n hri leng vanga inkharkhip hmang tangkaia ram leh hnam tana rohlu lehkhabu a lo ziak thei chu lawmawm a tih thu a sawi a. Zohnah-thlak hnam hrang hrangte tawng thu avanga kan inchemhar lek lek laite a awm tih pawh sawiin, heng Zohnahthlak hrang hrang tawng atang hian Mizo tawng hi a piang ang tih hi Zirlai pawlten an thlir thin thu a sawi. Kan unau Zohnahthlakte hi tlemin danglamna awm hret hret mahse, inpawmtawna, rorelna pakhat hnuaia kan awm theih hun tur hi ngaihtuah a ngai a ti bawk.

Khawpui fai endik mek zel

Mizoram khawpui fai endikna mekah en-dik hna thawktu, Panel of Expert te chuan nimin khan Lunglei leh Tlabung en lehin Vawiin hian Hnahthial an en hnuah tlai lamah Serchhip an rawn thleng anga, naktuk ah an enfiah ang.

Constitution Day hmang

Nimin Nov. 26, 2020 kha India Danpui hman tanna Ni, Constitution Day a ni a, ramchhung hmun hrang hrangah he Ni pual hian hun hman niin sawrkar Pisa leh zirna In-ah he Ni pual-a thuchham tur siam chu chhamrual a ni. Nov. 26, 1949 khan Constituent Assembly chuan India Danpui hmang tan turin a lalut a, January 26, 1950 khan hman tan a ni ta a ni. Kum 2015 khan NDA sawrkar chuan he Ni hi he Danpui duang-tute zing mi pawimawh tak leh Drafting Committee Chairman ni bawk, Dr. BR. Ambedkar-a hriatrengna atan hman tan a ni ta a ni.

ZPM PAC thutkhawm nei

ZPM Party-a PAC Extended Meeting chu nimin khan neiin diklo taka MNF MLA 12 ten ZPM Legislature Party Leader, Lalduhoma an hekna chungchanga Speaker in Vawiin-a thutlukna an puan tur chungchang an ngaihtuah tih an sawi a. Lalduhoma hi bial hnih, Serchhip leh Aizawl West-I bial mipuiten duh taka an thlantlin a ni tih sawiin, an hekna hi tihpuitlin a nih lohna tur leh a hun (term) a hman tluan ngei theihnana rorelna dik tak Speaker hian a siam theih nana Pathian hnena lo tawngtai turin mipuite an sawm a. Speaker thutlukna a zirin kal zel an tur an la ngaihtuah dawn tih an sawi bawk.

Free Symbol-ah a tello - MNF

MNF General Hqrs. chuan nimin khan thuchhuah siamin Aizawl Municipal Corporation (AMC) inthlanna lo awm turah ZPM chuan Election Symbol atana an duhthlan Symbol, Lukhumparh chu Election Free Symbol zinga a tel loh avangin sawrkarin phal lo angin sawrkar chu hemi chungchangah hian a mawh-chhiat tih an tarlang a. Free Symbol tarlan 30 zingah ZPM Party-in AMC Election symbol atana an  duh, Lukhumparh a tel loh avangin an hmang thei ta lo nia tarlangin, Dawt hmanga mipui bum tuma bul tan-ah an puh bawk.