Hunpui atana inbuatsaih dan tur thlirho a ni

* Kohhran ho te ah ngenna siam tum a ni

Nimin chawhnu khan Health Minister, Dr. R. Lalthangliana hovin COVID-19 hri leng kara kan hma lawka hunpui lo thleng tur atana Mizoram inbuatsaih dan tur ngaihtuahin thutkhawm neih a ni.

He thutkhawm SAD Conference Hall-a neih ah hian Home Minister, Lalchamliana leh I&PR Minister, Lalruatkima te bakah Medical Operational Team Chairman Dr. ZR Thiamsanga leh Chief Secretary, Lalnunmawia Chuaungo te telin sawrkar Department, NGO leh Kohhran aiawhte pawh an tel a. Kan hma lawka hunpui lo thleng tur Krismas leh Kumthar lawm leh hmuah chungchangah kumdanga hman thin a nih dan leh tunlaia Mizoram COVID-19 dinhmun an khaikhin a, khawvel ram hrang hrang dinhmun thlirin COVID-19 hripui hi Thlasik-ah a thawk na lehzual nia a lan avangin, COVID-19 hri leng lakah nasa lehzuala mitin kan fimkhur a tulin an hria a, mipuite himna a pawimawh ber tih hriain Kohhran hote pawh inkhawm, zaikhawm leh ruaitheh bakah mipui punkhawm theihna tur Programme huaihawt lo tura ngen nise an ti a ni.

Hei bakah hian he hunpui-a Dawrkaite inhawn dan tur pawh uluk taka sawiho niin ei leh bar zawnna kawnga harsatna lian zawk a thlen loh nan ruahmanna mumal taka siam tul tih a ni a. Heng bakah hian hunpui lo thleng tur chungchanga tih tur leh tih loh tur nia tha te rawtna chi hrang hrang sawiho a ni a. Uluk taka sawi ho a nih hnu ah Chief Secretary kaihhruai State Executive Committee, State Disaster Management Authority-in sawihona zul zuiin inkaihhruaina felfai tak a rang thei ang berin duang chhuak se an ti bawk.

He hunah hian COVID-19 hri leng darh zel tur ven nan Aizawl khawpui hmun hrang hrangah awlsam zawka in Test theihna tur, Mobile Testing Centre "kiosk" siam chungchangah a hmunhma ngaihtuahtu Medical Operational Team report ngaihthlak a ni a. Tunah hian  R. Dengthuama Hall, Mualpui leh Bawngkawn South Community Hall-a Floor pakhat chu hman theih tura buaipui mek a nih thu tarlan niin, Aizawl chhim lamah hmun laili pakhat chhinchhiah a nih tawh thu leh a neitu leh enkawltu thuneitu sang lamah hman phal dilna siam mek a nih thu tarlan a ni a, Aizawl tlak lamah hetiang hmun tur hi dap mek a nih thu tarlan a ni bawk.

COVID-19 hri kai zingah ZMC leh CCC ruahman sa a lut lova mahni insengso veka hmundanga awm duh te tan hetiang hmun tur hi ruahman tha tih a ni a, a tul anga Tourism Department hotute nen hmalak ho tum a ni. Mizoram puma No Tolerance Drive kalpui mek pawh thlirho niin, kan hma lawka hunpui lo thleng tur nen tun aia khauh lehzuala kalpui tha tih a ni bawk.