Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

Mizoram-ah hri kai 23 hmuh belh leh an ni

Niminpiah-a Mizoram-a Sample enfiah atangin COVID-19 hri kai mi 23 hmuh belh leh an ni a, hri kai hmuhchhuah tamna Aizawl khawpui chhungah hri kai hmuhchhuah an tlem zel.

Niminpiah khan ZMC Laboratory-ah Sample 365 enfiah niin hri kai mi 2 hmuhchhuah an ni a, District hrang hranga TrueNat Laboratory-ah Sample 234 enfiah niin hri kai 7 hmuhchhuah an ni bawk a, Rapid Antigen Test hmanga Sample 768 enfiah ah hri kai 14 hmuh an ni bawk. ZMC Laboratory-a hri kai hmuhchhuah te hi Aizawl Mission Veng leh Republic Vengthlang mi te niin pakhat hi West Bengal atanga rawn lut niin pakhat hi a chhungte hri kai tawh atanga kaichhawng a ni thung.

TrueNat Laboratory atanga hri kai hmuhchhuah 4 te hi Cham-phai Bethel Veng mi niin tualchhung a hri inkaichhawng an ni a, Kolasib District-ah hri kai pahnih hmuh niin tunhnaia Bihar inthlanna a Duty-a kal Mizoram Police mi leh sa an ni a, Lunglei District-a Tlabung-ah hri kai mi pakhat hmuh niin Silchar atanga rawn haw a ni thung.

Rapid Antigen Test hmanga hri kai hmuhchhuah 14 zinga 9 te hi Lawngtlai District mi an ni a, an vai hian tualchhung-a hri kai tawh atanga kaichhawng niin kum 10 hnuailam mi 3 an tel a, Aizawl District-ah hri kai 2 hmuh niin pakhat hi Civil Hospital Aizawl-a thawk a ni. Lunglei-ah hri kai mi pahnih hmuh niin 2nd Bn. MAP mi leh sa, tunhnaia Bihar inthlanna a kal an ni a, Serchhip District-ah Bihar atanga rawn kal, Prem Kram Company hnuaia thawk pakhat chu hri a kai tih hmuh a ni bawk.

Heti hian nimin thleng khan Mizoram-a hri kai hmuhchhuah chu 3788 an tling ta a, an zinga mi 3367 te chu enkawl dam ni tawhin tunah hian hri kai hmuhchhuah 416 an awm tawh a, hri kai zingah nunna chan mi 5 an awm nia chhinchhiah ala ni bawk.

India-ah hri kai hmuh nuai 93 aiin an tam tawh :

India rama COVID-19 hri kai hmuhchhuah chu nuai 93 aiin an tam ta a, darkar 24 kalta chhung khan hri kai enkawl dam aiin hri kai hmuhchhuah an tam leh zawk a ni. Darkar 24 kalta chhung khan India ramah sample 11,31,204 enfiah niin heng atang hian hri kai 43,082 hmuh leh an ni a, heti hian tun thlengin India ramah Sample 13,70,62,749 enfiah ni tawhin hri kai 93,09,787 hmuh an ni tawh a ni. Darkar 24 kalta chhung khan India ramah hri kai 39,379 te enkawl dam leh niin tun thlenga hri kai enkawl dam chu 87,18,517 an tling tawh a, hei hi hri kai hmuhchhuah atanga chhutin zaa 93.65 niin tunah hian hri kai enkawllai 4,55,555 an la awm a ni. Darkar 24 kalta chhung khan India rama hri kai zingah nunna chan 492 an awm leh a, heng mite nen hian tun thlenga hri kai te zinga nunna chan chu 1,35,715 an tling tawh bawk a ni.

Comments

Chhiar Hlawhte