COVID-19 hri kai 13 hmuh belh leh an ni

Niminpiah-a Mizoram-a Sample enfiah atangin COVID-19 hri kai mi 13 hmuhchhuah an ni a, ZMC Laboratory-ah Sample enfiah a awmlo thung.

Niminpiah-a Mizoram-a COVID-19 hri kai hmuhchhuah zinga mi 11 te hi TrueNat Laboratory-a hri kai hmuhchhuah niin midang pahnih te erawh Rapid Antigen Test hmanga hri kai hmuh an ni thung a. District hrang hranga TrueNat Laboratory-ah sample 143 enfiah niin hri kai 11 hmuhchhuah niin an zinga mi 10 te hi 2nd Bn. MAP mi leh sa, tunhnaia Bihar Assembly inthlan a duty-a kal niin Lunglei District-a hri kai hmuhchhuah te an ni a, Serchhip-ah hri kai pakhat hmuhchhuah niin Bihar atanga rawn lut BSF Sipai a ni thung.

Niminpiah-a Rapid Antigen Test hmanga hri kai hmuhchhuah te hi Aizawl khawchhung mi ve ve niin Chaltlang leh Ramhlun Vengthar mi leh sa niin hri kai tawh nen inkawmhnaih atanga hri kaichhawng an ni.

Nimin thleng khan Mizoram-ah COVID-19 hri kai 3660 hmuhchhuah an ni tawh a, an zinga 3203 te chu enkawl dam ni tawhin tunah hian hri kai enkawllai 452 an la awm a, hri kai zingah nunna chan mi 5 an awm tawh a. Nimin khan hri kai 11 te chu enkawl dam niin tun thlengin hri kai zinga zaa 87.51 te chu enkawl dam an ni tawh a ni.

India-ah hri kai nuai 91 chuang an awm tawh :

India ramah COVID-19 hri kai nuai 91 chuang hmuhchhuah an ni tawh a, heng zinga nuai 85 chuang te chu enkawl dam an ni tawh. Ministry of Health & Family Welfare chhinchhiahna atanga a lan danin nimin khan India ramah Sample 8,49,596 enfiah niin hri kai 44,059 hmuhchhuah an ni a, heti hian tun thlengin India rama Sample enfiah chu 13,25,82,730 niin hri kai hmuhchhuah tawh zawng zawng chu 91,39,865 an tling ta a ni. Darkar 24 kalta chhung khan India ramah hri kai 41,024 enkawl dam leh niin tun thlengin 85,62,641 enkawl dam an ni tawh a, hei hi hri kai hmuhchhuah atangin zaa 93.68 a ni a, tunah hian hri kai enkawllai 4,43,486 la awmin hei hi hri kai hmuhchhuah atangin zaa 4.85 an ni.

Darkar 24 kalta chhung khan India rama hri kai zingah nunna chan 511 an awm leh a, tun thlengin India rama hri kai zingah nunna chan 1,33,738 an awm tawh bawk a ni.