India Constitution 10th Schedule Para 2(2) bawhchhia-a a puh Lalduhoma MLA atanga ban a ni

MNF MLA 12 ten India Constitution 10th Schedule Para 2(2) bawhchhia-a an puh Serchhip bialtu MLA, Lalduhoma chungchanga thutlukna chu nimin khan Assembly Spaker, Lalrinliana Sailo chuan puangin, Independent MLA-a thlan Lalduhoma chu Mizoram Legislative Assembly Member a nihna chu hlih sak (disqualify) a ni.

MNF MLA mi 12 ten Lalduhoma an hekna chungchanga thutlukna puan hun a Pisa-a neih ah hian Assembly Speaker, Lalrinliana Sailo chuan thutlukna hi a eng zawng pawhin siam dawn se thutlukna siam nuam lo tak a ni ve ve tih sawiin, a thutna in a zir miau si avangin ti lo thei lo a nih thu a sawi a. Lalduhoma ban chungchanga Petition a hnenah lo lut chu uluk taka a zirchian (examined), ngaihtuah leh hetiang case chungchanga Parliament leh State Legislature hrang hrangah te an lo kalpui dan leh Speaker ten ruling an lo siam tawh te a zir hnuin thutlukna a siam tih a sawi bawk.

Speaker chuan Order a siamah Respondent, Lalduhoma, Independent Candidate chu eng Political Party mahin Candidate atana a chhawpchhuah ni lovin thlantlin a nih hnuah amah ngeiin a pawm leh a puan angin Zoram People’s Movement Party chu 19/8/2019-ah zawmin, hemi hnua a chetdan leh a khawsak zui dante avangin a chungah Ram Danpui (Constitution of India) 10th Schedule Para 2(2) chu amah ban tirna turin hman a lo ngaih tak thu a sawi a. Chumi dung zuiin Ram Danpui (Constitution of India) 10th Schedule para. 6-na leh a hnuaia Dan siam Mizoram Legislative Assembly (Disqualification on Ground of Defection) Rules, 1987 ten Speaker thuneihna a pek angin leh a chunga sawi takte behchhanin Schedule 10-na Para 2(2) angin Lalduhoma chu Mizoram Legislative Assembly Member a nihna atanga bantir a nih thu Speaker chuan a tarlang a. Hetiang a nih tak avangin Ram Danpui (Constitution of India) Article 190(3)-na angin, a thuthmun (seat) pawh ruak ta tih a puang bawk.

Speaker hian Lalduhoma MLA atanga ban (disqualify) a nih tih a puan hmain hemi chung-changa hma a lak dan te, MLA 12 te Petition a zirchian dan te, Lalduhoma insawifiahnate pawh uluk leh ngunthluk taka ngaihtuah a nih thu a sawi a. Supporting document zawng zawngte uluk taka zirchian a nih bakah Petition thehluttu MLA (Petitioner) te leh Lalduhoma (Respondent) te a huhova amah hmaa thutkhawmna neiin sawi duh an neih ang angte sawina hun siam sak an nih thute pawh a sawilang. A sawi zelnaah Speaker chuan hetiang case lo awm tawh nia sawi chungchanga Supreme Court thutlukna siam (ruling) chu a sawizau bawk.