Inremna ti hlawhtling tura hma la turin phut

Mizoram-a tlawmngai pawl intelkhawmna, NGO Coordination Committee chuan Union Home Minister hova Bru chungchanga inremna lo awm tawh, hri leng vanga bawhzui loha awm chu chak taka hma la turin sawrkar an phut thu an sawi.

YMA, MUP, MHIP, MZP leh MSU te telna, NGO Coordination Committee hi Inrinni khan Aizawl-ah thukhawmin hemi hnua thuchhuah an siam ah anmahni duhthu ngei a Tripura-a tlan thla Bru te chungchanga kumin January ni 16-a Union Home Minster hova Mizoram sawrkar, Tripura sawrkar leh Bru pawl hrang hrangin inremna an lo siam tawh, hripui leng avanga hun engemawchen bawhzui lova lo awm tawh chu tih hlawhtlin thuai a nih theihnan chak taka hma la turin sawrkar laipui, Mizoram leh Tripura sawrkar te an phut tlat tih an sawi a ni.

Kumin January ni 16 khan New Delhi-ah Home Minister, Amit Shah, Mizoram Chief Minister Zoramthanga leh Tripura Chief Minister Biplab Kumar Deb te hriatpuiin, State pahnih a Bru pawl hrang hrang te leh sawrkar chuan inremna an ziak a, he inremna ang chuan Mizoram atanga Tripura a chhuak Bru te chu an awmna hmun, Tripura-ah an awmnghet tawh dawn a, Nov. 30, 2019 hnu lama Tripura Relief Camp-a la awm te chu an duhthlanna in Tripura ah an cheng hlen thei dawn a, Mizoram a kir tawh te tan erawh Tripura ah let leh theih a ni tawh dawn lo a ni.