Latest News

Meizu mi 6 man leh an ni

Serchhip District Anti-Tobacco Squad te chuan Inrinni zing khan Serchhip Bazar building leh a chhehvel bakah Taxi leh Auto Rickshaw Stand-ah te Squad Drive an nei leh a, heng hmun an tlawhna ah hian Sikret leh Vaihlo kaihhnawih khuahkhirhna Dan bawhchhia a puipunna leh vantlang hmun-a meizu mi 6 an man leh a, heng mite hi pawisa chawitir nghal an ni.

Ni 2 chhungin COVID-19 hri kai za chuang hmuh a ni

Mizoram-ah COVID-19 hri kai hmuhchhuah an la pung chho zel a, Zirtawpni leh Inrinni, ni 2 chhunga Mizoram-a Sample enfiah atangin hri kai mi za chuang hmuhchhuah an ni.

Zirtawpni khan ZMC Laboratory-ah Sample 623 enfiah niin hri kai 42 hmuhchhuah an ni a, District hrang hranga TrueNat Laboratory-ah Sample 81 enfiah niin hri kai 7 hmuhchhuah an nih bakah Rapid Antigen Test hmanga Sample 400 enfiah ah hri kai 17 hmuhchhuah an ni bawk a, Zirtawpni-a hri kai hmuhchhuah zawng zawng hi mi 66 an ni.

Inrinni khan Mizoram-ah COVID-19 hri kai 40 hmuhchhuah leh an ni bawk a, ZMC Laboratory-ah Sample 469 enfiah niin hri kai 14 hmuh niin District hrang hranga TrueNatLaboratory-a Sample 147 enfiah atangin hri kai 18 hmuh an ni a, Rapid Antigen Test hmanga Sample 416 enfiah atangin hri kai 8 hmuhchhuah leh ni bawkin heng ni 2 chhung hian hri kai 106 zet hmuhchhuah an awm a ni.

Nimin-a Mizoram-a COVID-19 hri kai hmuhchhuah zingah hian tunhnaia Bihar inthlanna a Mizoram atanga Duty mi 4 an tel leh a, midang 25 pawh State pawn atanga rawn lut niin midang 11 te erawh tualchhung a hri kai tawh kawmhnaih atanga hri kaichhawng an ni thung.

Mizoram-a COVID-19 hri kai hmuhchhuah an pun mek lai hian hri kai zinga enkawl dam pawh an pung ve zel a, Inrinni khan hri kai enkawllai mi 46 zet chhuahtir niin nimin Pathianni khan hri kai 13 te chu dam-a chhuahtir an ni bawk a, heti hian nimin tlai thleng khan Mizoram a hri kai hmuhchhuah chu 3647 niin an zinga 3170 te chu enkawl dam an ni tawh a, tunah hian hri kai enkawllai 472 awmin hri kai zingah nunna chan mi 5 an awm tawh bawk a ni.

India ramah hri kai nuai 90 chuang hmuh a ni tawh :

Darkar 24 kalta chhung khan India ramah COVID-19 hri kai enkawl dam aiin hri kai hmuhchhuah an tam zawk a, tun thlengin India ram ah hri kai nuai 90 chuang hmuhchhuah an ni tawh. Ministry of Health & Family Welfare chhinchhiahna atanga a lan danin darkar 24 kalta chhung khan India rama Sample 10,75,326 enfiah niin hri kai 45,209 hmuh belh leh a ni a, hemi chhung hian hri kai enkawl dam 43,493 awmin nunna chan 501 an awm leh bawk a ni.

India ramah hian nimin thleng khan hri kai hmuhchhuah 90,95,806 an awm tawh a, an zinga mi 85,21,617 te chu enkawl dam ni tawhin hri kai hmuhchhuah atangin zaa 93.69 enkawl dam an ni tawh a, tunah hian hri kai enkawllai 4,40,962 la awmin hei hi hri kai hmuh atanga chhutin 4.85 a ni a, hri kai zingah nunna chan 1,33,227 awmin hri kai hmuh tawh atanga chhutin zaa 1.46 a ni bawk.

Comments

Chhiar Hlawhte