Chawhmeh man sang buaipui chhunzawm zel a ni

Aizawl khawpui chhunga chawhmeh man sang lutuk ti ziaawm turin sawrkarin MIZOFED leh MAHFED te tlawm zawka chawhmeh lakkhawm hnathawk turin a ruat.

Zirtawpni khan Commerce & Industries Department Director, J.Hmingthanmawia kaihhruaina hnuaiah Core Committee on Inspection of Market Price (CCOIMP) chu thukhawmin man man zawka mipuiten bazar-a thlai, thei leh sa an lei theihna tura duan, “The Mizoram Markets (Regulation & Facilitation) Ordinance, 2020” chungchang bakah tunlaia thlai thenkhat leh sa man to lutuk tihhniam dan turte an sawiho a. CCOIMP chuan Dan hman theih a nih hunah pawnlam atanga lakluh thlai thenkhat leh Mizoram chhunga thlai thar lakkhawm hna thawk turin Mizoram State Cooperative Marketing and Consumers’ Federation Ltd (MIZOFED) leh Mizoram State Agriculture, Horticulture & Cooperative Federation Ltd. (MAHFED) te chu mawhphurhna la turin a rawt a, anni hian hlep sang tak um lovin thlai thartute leh Bazara hralhchhuaktute inkarah hna an thawk dawn a, hei hian tuna kharchhawngtute avanga man to taka thlai leh thei zawrhchhuah te hi a tih tawp beisei a ni. Hei bakah hian thlai leh sa man thenkhat siam that ngai chungchang chu chawhmeh zuartute leh sawrkar thuneituten naktuk khian an sawiho leh dawn bawk a ni.