Latest News

Mizoram khawpui fai inelna neih mekah Serchhip khawpui fai dan enfiah a ni

Mizoram khawpui Fai thlanna kal mekah Inrinni khan khawpui fai endiktute chuan Serchhip khawpui chhung an endik a, chawhnu lamah Thenzawl an endik leh bawk.

Mizoram sawrkar hmalakna a Mizoram khawpui fai thlanna neih mekah hian khawpui fai endiktute hian Inrinni zing khan Chhiahtlang atanga tanin Serchhip khawpui chhung Veng hrang hrang an tlawhkual a, heng khawpui fai endiktu, Panel of Expert te hi Serchhip District Urban Development Officer, Vangthangpuii chuan kaihruaiin Serchhip Town Sanitation Task Force Member thenkhat ten an zui bawk a, Veng hrang hrang an fankual zawh hian DUDO Office-ah Presentation hun hman a niin he hunah hian F. Lalruatkimi, Sanitation Inspector chuan Pannel of Expert te chu Serchhip khawpui faina tura kawng hrang hranga hma an lakdan leh an hmachhawp te a hrilhfiah a, Pannel of Expert ten zawhna hrang hrang an neih te chhanna hun a hmang bawk.

Pannel of Expert te hian Serchhip khawpui chu Faina kawngah nasa takin hma an sawn thu te, a Concern Department in Presentation hmanga kawng hrang hranga hma an lakdan an sawifiah te, Veng hrang hrang an fankualna a mit-a an hmuh atangin an Mit a tlung hle tih an sawi a, ‘UD&PA Model Town’ ni hial awma an hriat thu te pawh sawiin, kawngpui kam faidan leh kawngkam lungrem leh Step leh tuiluankawr thlenga rawng inchawih mawi tak mai hnawih a ni chuan khawpui chu a fai mai bakah a timawi zuala an hriat thu te an sawi a, vantlang inthiarna hmun pawh a faiin a thianghlim thawkhat nia an hriat thu te, faina kawnga hmalakna ah khawtlang mipui, khawtlang hruaitu VC leh YMA te mai bakah MJA te nen DUDO, UD&PA Department chu an thawkho tha hle nia an rawn hmuh thu te an sawi bawk.

Serchhip khawpui chhung hmun hrang hrang an enfiah hnu tukthuan eikham-ah Panel of Expert te hian Serchhip khua chhuahsanin Thenzawl an tlawh leh a, Thenzawl khawchhung hmun hrang hrang te chu an enfiah chhunzawm leh bawk a ni.

Mizoram Sanitation Task Force (MSTF) hnuaia Mizoram Khawpui Fai Inelna, 2020 buatsaih endiktu (Panel of Expert) te hian Mizoram chhimlam an fang zo tawh a, Panel of Expert-ah hian member pali - Prof. Malsawmliana, Assistant Secretary, Central YMA; Dr Saithantluangi Zote, MIS, IPRO, I&PR Department; R. Lalrinfeli, Programme Officer, NGC, MPCB leh Lal Rinmawia, Secretary i/c Organisation, Mizoram Journalists’ Association te an ni a. Mizoram Khawpui Fai Inelna 2020 hi thuang (Category) thum-a kalpui niin, Category-I ah District Headquarters 11, Category-II ah khawpui (Town) dang 12 leh Category-III-ah Category-I leh II a tel khawpui 23 te an inel dawn a, khawpui fai inelna hnuhnung berah khan Serchhip hi District Hqrs. zinga khawpui fai berah thlan a lo ni tawh a ni.

Comments

Chhiar Hlawhte