Ni 2 chhungin hri kai 24 hmuhchhuah an ni

Zirtawpni-a Serchhip District-a Sample enfiah atangin COVID-19 hri kai mi 6 hmuh belh niin Inrinni-a Sample enfiah ah hri kai 16 hmuh an ni bawk a, ni 2 chhungin Serchhip District-ah hri kai 22 hmuh an ni.

Thudawn danin Zirtawpni khan Serchhip District-a TrueNat Laboratory-ah Sample 12 enfiah niin COVID-19 hri kai mi 6 hmuhchhuah an ni a, heng hri kai te hi mipa vek niin tun thla ni 12-a Assam atanga Serchhip District rawn thleng niin Bhartia Infra Project Limited hnuaia thawk tur leh Zuangleng-a an Company Camp-a inkhunghrang nghal an ni.

Inrinni khan Serchhip-a TrueNat Laboratory-ah Sample 37 enfiah leh niin hri kai mi 16 hmuh leh an ni bawk a, heng zinga mi 15 te chu mipa niin Bhartia Infra Project Limited hnuaia thawk tur bawk an ni a, hmeichhia hri kai pakhat hmuh niin Delhi atanga rawn haw, inkhunghranna hmuna awm mek niin a taksa-ah hri kai langchhuak tawh a ni. Thudawn danin Bhartia Infra Project Limited hi Serchhip District atanga chhim lama NH. 54 laihzauh leh siamthat hna thawktu tur an ni.

Hetihlai hian nimin khan Serchhip District-a hri kai enkawl mi 5 te chu enkawl dam niin Nursing School CCC atanga chhuahtir an ni a, heng mite hi tun thla ni 12-a hri kai hmuhchhuah te niin Bihar inthlanna duty rawn haw te an ni. Nimin thleng khan Serchhip District-a COVID-19 hri kai hmuhchhuah chu mi 132 niin an zinga mi 92 te chu enkawl dam an ni tawh a, tunah hian hri kai enkawllai 40 la awmin District pawnlam atanga hri kai enkawl tur rawn dah te nen hri kai enkawllai erawh mi 44 an la ni thung a ni.