CMRF for COVID-19 atangin lawmman siam sak duh

Mizoram Pradesh Congress Committee (MP-CC) chuan COVID-19 dona kawnga thawk tura mahni inpe te chu Chief Minister Relief Fund For COVID-19 atangin lawmman siam sak nise an duh thu an sawi.

Nimin-a thuchhuah an siam ah MPCC chuan Mizoram in COVID-19 a dona kawngah ral hmatawng (frontline) a awm turin mi engemawzat nunna thapin an inpe (volunteer) tih sawiin, heng mite hi an ngaihlu takzet tih an sawi a. Heng Volunteer-te hi hlawh phut hauh lova midangte tanpui tura inpe an ni na a, COVID-19 in thla 8 zet min chenchilh tak avangin volunteer thenkhat chu an inpekna hlu tak avangin an chhungkaw ei leh bar dinhmun lamin a tuar nasa tawh hle niin an sawi a. Amaherawhchu, midang tana nunna chan huama inpe an nih angin phun-nawi hauh lovin thla engemawzat chu hlawh nei lovin mipui tan an thawk tawh niin an sawi bawk.

MPCC thuchhuah chuan ZONET Cable TV leh Mizoram Government Doctors’ Association (MGDA) tangkawp chuan September 25, 2020 zan khan heng volunteer-te tan hian vehbur khawn sakin, pawisa tlingkhawm Rs. 13,50,000/- atangin volunteer 193 hnenah Rs. 7,000/- theuh leh chawimawina thuziak an lo pe tawh nia sawiin, Volunteer thenkhat chu NHM atangin lawmman pek an nih thu leh amaherawh chu sawrkarin a pe thei zel dawn em tih a chiang tawh lo thung niin an sawi bawk.

COVID-19 dona kawnga ral hmatawng a awm tura inpe, Volunteer-te dinhmun harsa taka an awm chu an Party chuan pawi an tih thu sawiin MPCC chuan, Mizoram mipuiin COVID-19 dona atan leh COVID-19 avanga harsatna tawkte tanpuina atana Chief Minister Relief Fund for COVID-19 a cheng vaibelchhe tam tak an thawhkhawm atanga Volunteer-te lawm-man tur hi siamsak nise an duh thu an sawi a ni.