Chanchin thar thenkhat :

Central YMA in mipui ngen

Central YMA chuan nimin khan thuchhuah siamin Krismas 2020 leh Kumthar 2021 hunpui lo thleng turah midangte harsatna siamtu nilova, tanpuitu ni theuh turin Mizo mipuite an sawm a, he Hunpui kan hman turah hian Halpuah, Hal-mawi leh puakthei thilte hi boruak ti bawlh-hlawhtu a nih rualin COVID-19 hripui leng mekah harsatna lian zawk thlen thei anih avangin mipuite kan him tlan nana zuarlo tur leh hmang lo turin mipuite an ngen a, Mizopa Rocket (Sky Lantern) chuan kangmei a chhuah theih avang leh kawlphetha semdarhna nasa taka a tihbuai theih avanga hmang lo tura ngenin, Silai lem a mu kapchhuak thei hman pawh nasa taka chhiatna thlen thei a nih avangin hmang lo turin mipuite an ngen bawk a ni.

Khawpui fai endik mek zel

Mizoram Sanitation Task Force (MSTF) hnuaia ‘Mizoram Khawpui Fai Inelna, 2020’ buatsaih endiktute (Panel of Expert) chuan nimin khan Lawngtlai khawpui an endik a, heng Panel of Expert te hian khawpui chhung hmun hrang hrang an enkual hnuah Lawngtlai-a NIC Conference Hall-ah UD&PA Lawngtlai District-a thawktute nen faina kawnga Lawngtlai khaw-puiin hma a lak dan chungchangah inkawmhona buatsaih a ni a, hemi hnu hian Lunglei endik turin an chhuak leh nghal a ni. Hemi hmalam hian heng Panel of Expert te hian Siaha khawpui pawh an lo enfiah tawh bawk a, Vawiin hian Lunglei leh Tlabung te an endik leh dawn a ni.

Vairengte in kawng an zawh

Nimin khan Vairengte-a NGO hrang hrang leh Vairengte Joint VC huaihawtin tunhnaia thi, Lalsiamthara thihna chungchangah a rang thei ang bera thudik chhuichhuak tura an duh zia lan-tirin mipui ten kawng an zawh a, he hunah hian mipui tel an tam hle a ni. Nov. 11, 2020 khan Lalsiamthara (2) hi bo in khawtlang in an zawn hnuah a ni 7-na ah a ruang hmuh a ni a, a thih danah hian midang inrawlh an awm niin an hria a ni.

ZPM te Lukhum hman phallo

ZPM Party AMC Monitoring Committee buat-saihin nimin khan Aizawl-a ZPM Party Conference Hall-ah AMC Candidate Orientation hun hman a ni a, he hunah hian ZPM Vice President, K. Sapdanga chuan AMC term thumna ah ZPM chuan AMC thar din an tum tih sawiin, AMC in-thlan ah hian MLA inthlana an symbol ‘Lukhum’ hman leh an tum chu sawrkar in a remtih sak loh avangin  ‘Tlang kara Ni chhuak (Sun with Rays)’ chu symbol atan an hman tur thu a sawi bawk.

Mipuite thawhpui ah sawm

PC Party Vice President, Lalrinzuala Chawng-thu chuan Mizoten chaw rinpui bera kan hman Buh-ah kan intodelh lo hle nia sawiin, kum 40 dâwn chhunga sawrkarna chelhtuten intodelh tura tih tak zeta hmâ an lâk loh avangin tun hi kan thleng niin a sawi a. Mizoram in kum khata buh kan tharchhuah chu quintal nuai 6 vel niin thla khata kan mamawh tlângpui hi quintal 100,000 -102,000 nia sawiin, buh-a intodelh tura thawhpui turin mipuite a sawm bawk.

AMC in hriselna ngai pawimawh

Aizawl Municipal Council (MAC) Mayor, PC. Lalhmingthanga chuan AMC-in mipuite hriselna a ngaih pawimawh thu leh hriselna tichhe thei bawllhhlawh thenfai kawngah theihtawpa hma la tu a nih thu a sawi. AMC Mayor hian nimin khan AMC Ward No.8 leh No. 26 huam-chhunga chhungkaw 400 tan Tuithianghlim Dahna tur Tuizem litres 1000 dawng a sem a; AMC chu ama sum thawhchhuah, State leh sawrkar laipui atanga a sum dawn hmanga Aizawl mipuite tana hmasawnna hna chi hrang hrang- thiang-hlimna leh faina kawnga mipui te nun khawnawm nana thawktu a nih thu a sawi bawk.

AMC Mayor chuan, kum 10 kalta nena khaikhinin khawpui khawlai leh luikawrte a fai tawh thu leh bawlhhlawh lakkhawma sawngbawl nan AMC chuan thlatin cheng nuai 50 a sen ral thin thu a sawi bawk.