Union Minority Affairs Minister Mizoram a rawn tlawh

Union Minority Affairs Minister, Kiren Rijiju chuan Mizoram rawn tlawhin nimin khan Siaha leh Lawngtlai khua te a tlawh.

Union Minister Kiren Rijiju hian niminpiah-a Mizoram a rawn thlen hnuah nimin zing khan Mara Autonomous District Council (MADC)-a Congress MDC 20 ten BJP an zawm avanga MADC sawrkar thar Induction chu Siaha Bazar-ah a hmanpui a, he hunah hian Kiren Rijiju chuan NE-ah Autonomous District Council nei 10 an awm thu sawiin, an dinhmun, an harsatna leh demand a in an loh theuh avangin Term hmasa a Home Affairs a chan laiin Sixth Schedule Amendment an tifel hman ta lo tih a sawi a, tun term chhung hian Mizoram-a District Council te duhdan ang thlapin Sixth schedule hi Amend a ni ang tih a sawi bawk.

Kiren Rijiju chuan Union Sports Ministry a chan angin Budget tharah Siaha District tan Sports Complex lian tham tak siam a ni ang tih a sawi a, Minority Ministry atang pawhin Siaha District tan nasa taka hmalak a nih tur thu leh kawngpui thatloh zia a zin kawngah amah ngeiin a hmu tih sawiin, a thawhpui Road Transport Minister te biain siamthat ngei a ni ang tih a sawi bawk.

Siaha-a hun a hman zawh hnu hian Kiren Rijiju hian Lawngtlai panin thla thar Dec. 4-a LADC inthlanna neih tur atan campaign hun a hmang nghal a, Lawngtlai-a an Party hruaitute hmaah thu sawiin hun reitak atanga Lai mipui ten an lo beisei tawh, ram Danpui hnuaia Sixth Scheduled siamtha a, sum leh pai bakah Council in inrelbawlna leh thuneihna lian zawk an neih theih nana Central Sawrkar an ngenna chu tih hlawhtlin a ni dawn tih a sawi bawk.

Union Minister hian niminpiah-a Mizo-ram a rawn thlen hnuah Helicopter hmangin chhim lam a pan nghal a, Sangau khua bakah khaw hrang hrangte pawh a tlawh nghal bawk a ni.