Serchhip-ah AHSA te tan intuaitharna leh HBYC chungchang zirhona neih tan a ni

Serchhip District chhunga Accredited Social Health Activist (ASHA) te tan ni 3 awh tur an hnathawhna kawnga intuaitharna leh Home Based Care for Young Child (HBYC) chungchang zirhona chu nimin khan neih Serchhip-ah neih tan a ni.

Serchhip P&E Veng YMA Hall-a ‘Refresher-cum-HBYC Training for ASHA Serchhip District’ hawnna hun nimin-a neih hi Serchhip CMO, Dr. Laldawngliana Sailo chuan hmanpuiin kumtin ASHA te tan hetiang hun hi buatsaih thin a nih thu leh kumtin ASHA hna thawk thar te an awm bakah an hnathawh tur ruahman thar te a awm thin avangin hetiang hun an buatsaih te chu ngai pawimawh turin ASHA kalkhawmte chu a chah a, he huna an thil zir te an hnathawhna kawngah tangkai taka an hman theihna turin an thil zir te uluk tak leh hriatthiam tumna nena zir turin a chah bawk a ni.

He training hawnna hun Deborah Vanlalchhuangi, District Programme Manager kaihhruai-a neih ah hian State Asst. ASHA Programme Manager, T. Lalthanpari chuan he hun an hman chhan leh he Programme in a tum te sawiin, tuna ASHA ten hna an thawhna pakhat, Home Based Newborn Care (HBNC) hnuaia ASHA ten nausen alo pian atanga ni 42 chhung an tlawh thin chu Home Based Care for Young Child (HBYC) hnuaiah chuan nausen a pian atanga thla 3, 6, 9, 12 leh thla 15 an nih thlengin ASHA te hian an tlawh dawn thu a sawi a, he hna hi he training an neih zawh, tun thla ni 30 atanga an thawh tan nghal tur thu leh Mizoram-ah Mamit leh Lunglei-ah training buatsaih tawhin Kolasib leh Champhai-ah te training hi buatsaih leh tum a nih thu a sawi bawk.

State Asst. ASHA Programme Manager chuan Mizoram-a nausen thihna chu ASHA te hnathawh avangin nasa taka a tlem phah thu pawh sawiin, chutihrual chuan an hnathawh avanga an lawmman dawn ve tur te a hun taka pek theihloh a awm thin chu pawi a tih thu a sawi a. Amaherawh chu an hlawh ve turah hian bothlau ala awmloh thu sawiin, hei vang hian thahnem ngai taka thawk zel tur leh tuna he hmalakna thar ah pawh hian lawmman an dawn tur thu a sawi a. ASHA te hna chu a pawimawh avangin an intuaithar ve reng a pawimawh thu leh an hnathawh tur hrang hrang duansa te chu tha taka zawm turin a chah bawk. Hri leng kan buaipui mekah pawh ASHA te chu an tihtur chin te ngai pawimawh turin a chah bawk.

Serchhip District-ah hian ASHA 64 awm mekin ‘Refresher-cum-HBYC Training for ASHA Serchhip District’ ah hian mithiam thlanchhuah hrang hrang ten heng mite hi thupui thlanbik hmangin zirtirna an pe dawn a, sawrkar in hri leng laka himna tura ruahmanna a siam te zawm chungin he hun hi hman a ni dawn a ni.